SHILLONG: France a·songni dam 100 batpile theatre ba jawilwat mesokram biaprango ‘Rapture’ jawilwatko mesoke mingsing minggamako man·ahaoba Meghalaya a·dokode dakchakanirangko man·jaengani a·sel ia jawilwatko tarigipa aro jawilwat tarianio national award-ko man·gipa Dominic Megam Sangma mesokna man·skakujaenga.
A·doktango ua ia jawilwatko mesokna krengbeengoba da·o dipet una a·dok sorkarini gita maming dakchakanirangko on·kujaengani gimin ‘Rapture’ jawilwatko mesokna man·kujaengachim.
Iani bidingo kobor ra·timgipa manderang baksa agangrikengon, ia jawilwatko France a·songo mesokna man·pilahaoba aro ia jawilwatko mesokna dingtang dingtang biaprangona songreangahaoba a·doktangode dakchake on·giparang dongjae ia ‘Rapture’ jawilwatko mesokna man·kujaenga ine Dominic Sangma parakataha.
“Anga maming dakchakanirangko man·jaenga aro da·alona kingking sorkarini gitaba ia jawilwatko mesokna angna maming dakchakanirangko on·na dongkujaenga,” ine Sangma aganaha.
“Anga angni jawilwatko an·tangni manderangnaba mesokna sikpaengani gimin namen jottonde ka·enga. Ia jawilwatko mesokna sikjaenga inesa manderang angko ma·sisrettokenga indiba indake ong·ja aro anga dakchakgiparang dongjani a·selsa a·doktango ia jawilwatko mesokna man·kujaenga,” ine Dominic aganaha.
Dominic-ni aganani gitade, iandakgipa jawilwatrangko mesokna bang·en korosrangko nanga aro ua an·tangaride iako dakna amsokjaengachim.
Ia ‘Rapture’ jawilwatko ua jedakeba Tura-ode August 15 tarikoni August 25 tarikona mesokna parakatmanaha ine janapatengon, “Tura-oba ia jawilwatko mesokna projector-rangko, sound system-rangko aro manderangko bang·en nangengani gimin bang·en koros ka·na nangenga,” ine Dominic parakataha.
“Iandakgipa jawilwatrangko mesokaniara CD player-rangko mesokani gita ong·ja maina iandakgipa jawilwatrangko mesokna dakna nanggnirang bang·a. Iako manderang ma·sitokjaenga. Chinga ia jawilwatko Shillong songjinmaoba September jao mesokna sikengachim indiba da·o dipet chinga somoirangko man·kujaenga,” ine Dominic Megam Sangma aganaha.
