SHILLONG: Ia 2024-2025 bilsini Union Budget-ko Mongolbar salo, Union Finance Minister Nirmala Sitharaman Parliament-o jinmana parakataha aro ia Union budget-o ua mitam kajinarangko bariatna, sam aro mobile phone-ni damrangko komiatna aro chadamberangna jakni kamrangko skie on·anichi kamrangko ka·e cha·na chol on·na tik ka·angaha.
Union Finance Minister-ni parakatani gitade, 2024-25 bilsini budget-o chu·gimik receipt-ko gong kror lak 32.07-na hisape chu·gimik expenditure ba korosna gong kror lak 48.21-ko hisape donangaha aro Tax receipt-ko gong kror lak 25.83-na hisape, fiscal deficit-ko GDP-ni 4.9%-na hisapskaaha.
Income Tax ba dormahani kajinako bariatanio, dormahana kam ka·enggipa manderangni kajinako gong 50,000-oniko gong 75,000-ona bariatna tik ka·aha aro unbaksana Pensioner-rangna Family Pension-oniko kattianikoba gong 15,000-oni gong 25,000-ona bariatna tik ka·aha ineba Sitharaman aganaha.
Finance Minister-ni aganani gitade, kajinako bariatanio, 0-oni lak 3-ona dormaha cha·giparangnade kajina dongjawa, lak 3-oni lak 7-onade 5 percent, lak 7-oni lak 10-ona 10 percent, lak 10-oni lak 12-ona 15 percent, lak 12-oni lak 15-ona 20 percent aro lak 15-na batgiparangde 30 percent ong·skagen.
Ia bilsio bading chiwalani kamrangnade kajinako komiatskana ma·mong sorkari tik ka·angaha ineba ua aganaha.
Ia 2024-2025 bilsini budget-o gipin mongsonggipa bakrangara, mobile phone, sona aro rupani damrang tang·onanggen, gama ge·ani kamrangna gong kror lak 1.52-ko chamahani gimin game ge·e cha·giparangna namgni ong·gen ineba Union Minister aganaha.
Sitharaman-ni parakatani gitade, PM Gareeb Kalyan Anna Yojana-koba ma·mong sorkari, bilsi 5-na ra·dodapatahani gimin ian a·song gimikni crore 80 manderangna namgni ong·gen.
2024-25 bilsini gisepo India a·songo songdongenggipa Tribal-rangni janggi tangani gadangko tang·doatna gita ma·mong sorkari, PM Janjatiya Unnat Gram Abhiyan-ko a·bachengatgen aro ia program-ni ning·o dam 63,000 songrangko man·chape, kror 5 Tribal manderangna namgniko ra·bagen ineba ua aganaha.
A·song gimikni rama jal·langrangko namdapatna gitaba ma·mong sorkari, ia bilsini gisepo gimik gong kror 26,000 tangkarangko chame donataha ineba Union Finance Minister parakataha.
Chadamberangna janggi tangani cholrangko on·na gitaba ma·mong sorkari, da·o bilsi bongani gisepo sak lak 20 chadamberangna dingtang dingtang jakni kamrangko skie on·na tik ka·aha ineba ua aganaha.
Bilsiantian wachini somoirango chi bananirangchi manderang neng·nikanirangko chagrongna nangtokengani gimin ma·mong sorkari dingtangmancha Assam a·dokna gong kror 11,500 tangkarangko on·na gitaba tik ka·angaha aro unbaksana wachini somoirango Sikkim aro Uttarakhand a·dokrangoba manderang neng·nikanirangko chagrongna nangengani gimin ma·mong sorkari, ia a·dokrangnaba dakchakanirangko on·na tik ka·angaha.
Lekka porani gitaba, higher education-o poraigipa chatro chatrirangna ma·mong sorkari, gong lak 10-ona kingking loan-ko on·na tik ka·angaha ineba Union Finance Minister parakataha.
Indake ong·engon, Union Budget-ko kangal cholgri, me·chikrang, chadamberang aro game ge·e cha·giparangna dingtangmancha gisik on·e tariaha inenba ia Budget-ko Meghalaya sorkari mittelpilataha.
Ia bilsini Union Budget-o gama ge·ani, kamrangko ka·e cha·ani chol, jakni kamrangko skie on·ani, Human Resource Development, Social Justice, Manufacturing Services, jillarangko namdapatani, chel·chakanirangko bariatani aro uandakgipa mingsku kamrangna gisik on·bataniara Meghalaya a·dokni Mission 10 baksa nangchapangani gimin ian a·doko dal·roroaniko ra·bana cholrang ong·gen ine Finance (Budget)-ni Joint Secretary parakataha.
Capital Investment-na dingtang dingtang a·dokrangna on·enggipa Special Assistance-o gong kror lak 1.3-oni gong kror lak 1.5-ona kingking bilsi 50-na sud gri indin loan-ko on·aniara Meghalaya a·doko namroro silroroaniko ra·bana dakchakani ong·gen ineba Joint Secretary parakataha.
2023-24 bilsini gisepo gong kror 1300-na baten ia scheme-ni ning·o Meghalaya sorkari koros ka·aha ineba Finance (Budget)-ni Joint Secretary aganaha.
Joint secretary-ni aganani gitade, dam 100 songjinmarango Industrial Park-rangko kulina ia budget-o ma·mong sorkari parakatahani gimin ian Meghalaya a·dokoba a·gilsakni gipin biaprango gitan industrial park-rangko kulina chol man·gnok.
