NEW DELHI: Adita jarangni gisepon ong·atna sienggipa Gambegre Assembly constituency-ni by-election-o cheenba Gambegre seat-ko ra·piltaina man·na gita Meghalaya Pradesh Congress Committee (MPCC)-ni dilgiparangko aro Congress dolna kam ka·enggipa manderangko ku·cholsan ong·e kam ka·china Indian National Congress (INC)-ni dilgipa Sonia Gandhi didiataha.
Lok Sabha election-o jekai chena man·aha apsan daken Gambegre by-election, district council election aro bilsibrini ja·man ong·atna sienggipa Assembly election-oba chena man·na gita rakbee kamrangko ka·angkuchina gitaba Gandhi, MPCC-ni dilgiparangko didiataha.
Sukrobar salo, MPCC-ni president Vincent H Pala aro gipin dilgiparang baksa an·tangni noko tom·e chanchirimengmiting somoio Gandhi, MPCC-ni dilgiparangna agan-ku·pattianirangko on·ataha.
Lok Sabha election-o Congress dol, Tura parliamentary seat-kode cheahachim indiba Shillong parliamentary constituency-ode amako man·skaahachim.
Changgittamna Shillong-ni MP ong·anggipa Pala, ia chang Voice of the People’s Party (VPP)-ni jako amako man·rikahachim.
Meghalaya a·dokni bilsi 50 gapanio ru·uta bilsirangnan Congress dol rim·kepe dongna man·ahachim indiba bilsidokna skang, NPP-ni jako amako man·skaahachim.
Lok Sabha election-ni ja·man Congress dol da·o mai obosta ong·enga, uarangni giminba All India Congress Committee (AICC)-ni dilgipa Sonia Gandhi, MPCC-ni dilgiparango sing·sandie ra·rikaha.
Kobor on·timgiparangni u·iatani gitade, Lok Sabha election-o Tura parliamentary seat-ko cheani ja·man doltangko wate katenba dingtang dingtang dolrango napanggipa Congress dolni gitcham dilgiparang da·o doltangona re·bapilna miksongtokenga.
Iana skang, MPCC-ni dilgiparang, AICC-ni general secretary Venugopal baksaba Budbar salo tom·e agangrikangaha.
AICC-ni dilgiparangko grongeanio dongpae bak ra·anggipa MPCC-ni gipin dilgiparanga, Tura-ni MP Saleng A Sangma, MPCC-ni working president Deborah C Marak, general secretary Wansuk Syiem aro gipinrang ong·a.