SHILLONG: State Congress, Gambegre seat-ko man·rikna raken jotton ka·enga, idnake Lok Sabha-ni Opposition dilgipa aro Congress-ni gitcham president Rahul Gandhi-ko campaign ka·na gita okamenga.
“Sonibar salo Rahul Gandhi-ko gronge, Gambegre by election-na campaign ka·na gita okamaha, ine gitcham Lok Sabha MP aro MPCC chief Vincent H Pala, aganaha.
Indiba Rahul, campaign ka·na re·bagenma re·bajawa iani gimin agankujaenga.
Meghalaya-oni Congress delegation, Pala-ni dilanio party-ni dilgiparangko grongaha aro Gambegre by poll aro MDC poll-ni gimin u·iataha.
Uandake candidate-ko seokani gimin agangrikama ine sing·on Pala indine aganchakaha, “skanggipa a·doko tik ka·chenggen uni ja·man party dilgiparangni ra·chakanina watatgen.”
Iarangni gisepon Garo Hills-ni political-ni bidingo agangrikaha ineba MPCC chief aganaha.
MDC election-ni bidingo aganengon, “da·onan tarikko on·kuja indiba party, block level-oni candidate-rangoniko application-ko bi·atenga aro iana somoiko nanggen ine aganaha.
Minggipin Congress-ni dilgipa Sonia Gandhi, mija Sukrobar salo Meghalaya Pradesh Congress Committee office-bearer aro gipin dilgiparangko Gambegre seat-o man·riktaina rake kam ka·china didiataha.
A·dokni dilgiparangko Tura Lok Sabha poll-o Congress-ni cheaniko mikkangchiba rakkiangna gita aro district council election aro assembly election-na tarie dongchina agan-ku·pattiaha.
MPCC dilgiparang-ko uni noko grongao Sonia, ia kattarangko aganaha. Lok Sabha poll matchotani ja·man ian skanggipa MPCC dilgiparang Gandhi-ko grongaha.