SHILLONG: Adita salrangna skang, Paris songjinmao ong·atenggipa ia 2024 bilsini Olympics-ko oprakanio, Leonardo da Vinci-ni ‘Last Supper’ ba ‘ Jisu Kristoni Bon·kamgipa Mi attam’-ko dakmesokanio, Kristianrangko onia ka·a gita ong·ahani gimin Meghalaya a·dokni Chief Minister Conrad K Sangma-ba iako raken jegalataha.
Ia dakmesokanio, Jisu Kristoni chisolo datkapako man·na skang, an·tangni sninggiparang baksa bon·kame mi attam cha·aniko mesokahachim indiba ia dakmesokanio manderangko ka·dingatna dingtange tarianiara Kristianrangko onia ka·ani gita ong·aha ine a·gilsak gimikon Kristianrangni jegalanirangko social media-rango nikna man·ahachim.
Iani bidingo a·dokni Chief Minister Conrad K Sangma-ba an·tangni suk ong·gijaniko social media-o janapatengon, “Paris Olympics-o Jisu Kristoni ‘Bon·kamgipa Mi Attam’-ko dakmesokmanio iandake mesokahani gimin anga namen suk ong·jaha. Toromni kamrangkode mande ra·grikna nanga aro ia kamko anga raken jegalenga,” ine parakataha.
Ia dakmesokani bidingo jegalgrimani ja·man, Paris songjinmao Olympics kal·susaaniko sokachakenggipa aro ong·atenggipa manderang, Catholic aro dingtang dingtang Kristian ma·malrango kemako bi·atskaaha.
ReplyForward
|