EGH-o TB-oni jakgitel ong·gipa songrangna mande ra·pilskaaniko daka

WILLIAMNAGAR: East Garo Hills a·jao Tuberculosis (TB) sabisioni jakgitelgipa songrangna mande ra·pilskaaniko dakna gita Mongolbar salo East Garo Hills District Tuberculosis Office-ni gita dingtangmamcha program-ko Williamnagar-ni DRDA Hall-I-o ong·atangaha aro ia program-ko ong·atanio, dingtang dingtang department-ni officer-rang, songni Nokma-sordarrang, Village Health Council-ni dilgiparang, ASHA-rang, Anganwadi worker-rang, Nikshay Mitra-rang aro gipinrangba dongpae bak ra·angtokaha.
TB-oni jakgitel ong·na man·ahani gimin ia salni bako, Dambo-Rongjeng C&RD Block-ni dam 6 songrang, Samanda C&RD Block-ni dam 9 songrang aro Songsak C&RD Block-ni dam 9 songrangna East Garo Hills a·jani Additional Deputy Commissioner aro Williamnagar Municipal Board-ni Chief Executive Officer Ripamchi N Sangma-ni jakchi certificate-rangkoba on·angjolaha.
Ia program-ko ong·atanio, East Garo Hills a·jani ADC aro Williamnagar Municipal Board-ni CEO Ripamchi N Sangma, mongsonggipa sokgipa ong·e jinmana aganprakangengon, East Garo Hills a·jako TB saaoni jakgitelgipa a·ja ong·atna kam ka·anio bakrimaniko on·china a·jani manderangko didiangaha aro ia gital chasongo sanna banani cholrangba nambatahani gimin TB saaniko altuaen sanna man·gnok ine parakangaha.
2025 bilsini gisepon TB saaniko chu·gimik bon·atsrangna man·na gita TB sabisini bidingo manderangna awareness program-rangko ong·atangkuchinaba Sangma didiangaha.
Ia program-ko ong·atanio, East Garo Hills a·jani District Medical & Health Officer (DM&HO) Dr CEN Sangma-ba jinmana aganprakengon, an·tangtangni songko TB-oni jakgitel ong·gipa song ine parakna man·na gita rakbate kamrangko ka·china songni nokni manderangko didiangaha.
Ia program-ko ong·atanio, Garo Hills-o git ring·anina mingsinggipa Enosh Sangma-ni ring·gipa ‘TB Sabisi Nampilna Man·a’ ingipa gitko East Garo Hills a·jani ADC aro Williamnagar Municipal Board-ni CEO Ripamchi N Sangma-ni jakchi oprake on·angjolaha.