SHILLONG: MCS (Prelims) porikka aro Meghalaya Police Service-ni result-rangko parakanio nangchakegipa dingtang dingtang neng·nikanirangko namatna gita Khasi Students Union (KSU), konta 48 somoiko Meghalaya Public Service Commission (MPSC)-na on·angaha.
Ia porikkani result-rangko parakanio, mark-rangko chapa ka·e mesokchina, ong·gija dakgipa kamrangni bidingo jakgitele sandirokchina, result list-o gimaenggipa candidate-rangni bidingo talataniko on·china aro pilak dakgualanirangko namatchina KSU dabienga.
Statistical Officer-ni kamko saksanasan advertise ka·ahaoba iana candidate sakgniko ra·ahani giminba talataniko on·china KSU dabienga.
MCS (Prelims) porikkani bidingo MPSC-ni talatanioba KSU, chu·ongnikgijaniko parakataha aro ian MPSC-ni niamrangko pe·ani gita ong·aha ine parakataha.
MPSC-o candidate-rangna answer key-rangko on·a gita dongimin niamrang dongama, donggenchim ong·ode answer key-rangko prelims porikkani result-ko parakatna skang maini gimin jinmana mesoke on·a man·jaha aro indake ong·jagenchim ong·ode MPSC-ni gita maini gimin iandakgipa badi ka·anirangko ra·chakaha ineba KSU sing·doataha.
Answer key-rangko man·ani ja·mano minggittam aganchakanirango gualani donga inenba u·ina gita man·aha aro iakon Commission-ni gitaba ra·chakaha ineba KSU parakataha.
“Bebegita chong·mot aganchakanion gualani donggenchim ong·ode aro nipiltaianiko dakani ja·mano dingtangatanichi sak 62 candidate-rangko ra·daptaiani ong·ahachim. A·bachengo seoka man·gipa candidate-rangni aganchakanioba gualani donggenchim ong·ode, uamangba mains porikkaona sokdona kragiparang ong·jawachim, indiba da·o dipet darangni bimingrangkoba ra·galaniko nikkuja,” ine KSU parakataha.
KSU-ni parakatani gitade, 2023 bilsini July 18 tariko advertise ka·anio, ‘Main porikkana okama man·gipa candidate-rang, parakgimin bangbang ong·gipa biaprangna chang 15 batna man·jawa ine Para 8-o janapani dongachim.
“Uni gimin advertise ka·gipa dam 35 kamrangna main porikkana okama man·gipa candidate-rang sak 525-san ong·na nangaiachim indiba da·o seoka man·gipa candidate-rang sak 642 ong·pilahani gimin ian MPSC-ni tarigimin niamtangkon kal·steka gita ong·enga,” ine KSU parakataha.
Porikkani mark-rangko jinmana mesokchina aro ia a·selni bidingo jakgitele sandirokchina dabiangengon, ia dabianirangko konta 48-ni gisepo chu·sokatja ong·ode rakgipa ja·kurangko de·anggen ine KSU mikrakataniko on·angaha.