SHILLONG: Civil Defence & Home Guards department-o dam 400 biaprang bangbang ong·e dongengani gimin ia biaprangko gapatna gita sorkari bakan recruitment drive-ko ong·atna sienga.
A·dokni Civil Defence & Home Guards Minister Comingone Ymbon-ni parakatani gitade, ia kamrangko September jaoni gapatna a·bachengatgen.
Home Guards-ni bangbang ong·e dongenggipa kamrangko gapatanichi Police department-o sipairangni chu·onggijaniko namatna aro traffic-ni kamrangko nirokanioba dakchakani ong·gen ine Ymbon aganaha.
Home Guards-o gapatna sienggipa kamrangara, sub-inspector-rang, guardsman-rang, driver-rang aro non-combatant staff-rang ong·gen ineba Home Guards Minister parakataha.
Tura-ni sak 300 home guard-rang jabrini dormaharangko man·kujaenga ine adita salrangna skang a·dokni Chief Minister-na sedoatgipa chittini gimin sing·anina aganchakaniko on·angskaengon, home guard-rangna somoi gita dormaharangko on·jaenga ine matnangako jegalatenba, da·o dipet home guard-rangna dormaharangko on·anio maming neng·nikanirang dongkujaengachim ine Civil Defence & Home Guards Minister parakataha.
Tura-o Home Guard-rang, an·tangtangni kamko name chu·sokatengoba jabrini dormaharangko man·kujaengani a·sel neng·nikanirangko chagrongna nangtokenga ine adita salrangna skangsan A·chik Progressive Approach (APA) dol parakatahachim.
Iani bidingo a·dokni Chief Minister-na badi ka·e sedoatengon, Tura-ni Home Guard sipairangkoba Tura-ni Traffic Police-rang baksa traffic ba gari gorarangni re·ruraanirangko nirokna kamo donatenga aro Home Guard-rang, an·tangtangni kamrangko name chu·sokate on·engoba jabrini dormaharangko man·tokkujaenga ine APA parakatahachim.
APA-ni parakatani gitade, Khasi Hills a·jao Home Guard-ni kamko ka·enggipa sipairang jaantian an·tangtangni man·na nangenggipa dormaharangko man·tokenga indiba Tura-o kam ka·enggipa Home Guard-rangde somoi gita an·tangtangni dormaharangko man·tokskajaengachim.