Manderangni vote on·ne seokgipasa Gambegre seat-ko man·gen: Saleng

SHILLONG: Bangbang ong·e dongenggipa Gambegre seat-na Congress, party worker Jingjang M Marak-ko chakatatnaba donga.
Tura MP aro Gambegre-ni gitcham MLA Saleng Sangma, The Shillong Times-ni kobor ra·timgi-parang baksa agangrik-mitingo ia kattarangko aganaha. Party convention-ni gita, party candidate-ko AICC-ni tik ka·a ja·mansa parakatna man·gen. Batanggimin bilsi 2018 election-o Jingjang M Marak, South Tura-oni independent candidate ong·e susahachim indiba ua election-o sirikakaha. Uandake party, election-na tarisoa-nirangko a·bachengataha, Assembly session matcho-ta ja·manoni campaign ka·aniko a·bachenggnok ine Saleng aganaha. Aro NPP-ni chakatatna mik-songenggipa Mehtab Chandee-ko chena ka·-dongani dongja ine aga-naha.  “Je candidateba election-o chakatchina, bon·-kamaode manderangsa vote on·ne dilgipako seok-gen, Gambegre-ni MLA sawa ong·gen, iade mande-rangni vote on·aniosa pangchaka ine agankuaha.
Gambegre seat, MLA Saleng Sangma-ni watani ja·man bangbang ong·aha. Ua Tura Lok Sabha election-o cheani ja·man MLA ong·aoni resign ka·aha.