Ampati: Chiringpara-oni 33VK Line-na kam ka·a matchotaha aro re·baenggipa anti August 8-oni bijoliko watgnok ine Meghalaya Power Distribution Corporation Limited (MePDCL), manderangna u·iataniko on·aha.
Bijoliko watna sienga simsakchina aro bijoli krongrangko sillitingrangko mamingkoba dangtapjachina aro kengnirang ong·ani gimin bijoli krong sepango ba bijoli krongrango matchu-matte jila-alarangko ka·jachina gitaba Betasing aro Zikzak C&RD Block-ni ning·o songdonggipa manderangna u·iataniko on·aha.
U·iataniko manigija dake ka·e maiaba a·selrang ong·na nangode corporation-ni daito ong·jawa ine koboro agandapaha.
“Bijoli sillitingrang ba conductor a·ao ga·akako saoba nikode ra·galna ba talatna ta·raken sepangjolo donggipa MePDCL office-na u·iatchina,” u·iatanio janapaha.
SWGH-o AHAM, UBSI in-charge-ni Tranfer Order-ni gimin chanchidila
U·IATTIMGIPAONI
AMPATI: Monabari-o bang·a dingtang dingtang NGO-rang, Nokma-rang, Self Help Group, VO aro ua jolni manderang Monabari Outpost-ni UBSI Incharge Arpheus N Sangma-ni Transfer Order-ko ta·raken ra·galchina chanchigrikaha. Ua namen gisik nangbegipa aro on·kanggipa office ong·a aro a·jolo manderang baksa meligipa ong·a. A·jolni manderangni namgnina ia mamlako nirokatchina chinga re·baenggipa antio Memorandum-ko Meghalaya-ni Chief Minister Conrad K Sangma-na on·gen.
Outpost-ni ning·o ga·akgipa song 12-ni Nokmarang aro dingtang dingtang SHG-rang dongpaaha. A·jolo uko kam ka·angkuako nangnike uamang uamangni ku·rangko raken on·enga. Uni namgipa-ra·chaktogipa dilgipa ong·anichi aro on·kanganichi chingni manderangna tom·tomani aro namgniko ra·baaha, uko gipin biapona apjitange chingni a·jolna dal·begipa gimaani ong·aha.
A·jolni manderangni ra·chakna man·gijagipa niam gri kamrangko an·tangtang ka·e aro jak donge uni kosako tol·tole matnange uni kamko apjitatenga. Niam gri dakani kamrangko ka·giparangko bon·atna uni neng·nika gri jotton ka·anina aro bichalko ra·baana Sangma-ni ku·rachakani baksa chingaba chakpaenga aro uko namgija biming man·atna ong·ai-ong·jae matnanganirangko chinga dakna on·jawa.