TURA: Directorate of Health Services (MI)-ni contractual kamrangna ra·anio mikkang niteanirang donga ine Robibar salo, Garo Hills-ni social activist saksa Junebirth Marak matnangataha.
Marak-ni parakatani gitade, DHS (MI)-ni ning·o ge 325 contractual kamrangna July-ni 8 tariko advertisement-ko on·enba July 27 tariko porikkako ra·ahachim. Salbrini ja·man July-ni 31 tariko, sak 1523 candidate-rangko seoke result-ko parakatahachim ine Marak u·iataha.
Ge 213 kamrangkode Khasi-Jaintia Hills a·jana aro ge 112 kamrangkode Garo Hills jolrangna u·iatahachim ine janapatengon, “Seoka man·gipa candidate-rangoni Khasi-Jaintia Hills a·jarangoniko sak 1393 indiba Garo Hills jolonikode sak 139 candidate-rangkosan seokaiaha. Garo Hills gimiko seoka man·gipa candidate-rangara sak 58-de West Garo Hills-o, jeon sakbongade gipin jatrang, sak 23-de East Garo Hills-o, sak 18-de South Garo Hills-o, sak 23-de North Garo Hills-o, jeon saksade gipin jat aro sak 17-de South West Garo Hills a·jao, jeon sak 11-de gipin jatrang ong·a,” ine Marak parakataha.
Garo Hills-na dongimin ge 112 kamrangna seoka man·gipa sak 139 candidate-rangoniko basedapangkugen ine janapatskaengon, candidate-rangko komiatangkuanichi ia kamrangko gapatna candidate-rang chu·ongtaijawaha ine Marak parakataha.
Ampareen Lyngdoh, health minister aro Ram Kumar Health department-ni in-charge ong·a intalan Garo Hills-ni candidate-rangko seokanio mikkang niteanirangko nikna man·enga ineba ua matnangataha.