TURA: West Garo Hills a·jani Garobadha jolo, me·chik bi·sa saksako kragija dake kal·aka ine ma·sina man·ani ja·man, Garobadha jolni dingtang dingtang dolrang aro jolo songdongenggipa manderang, dos dakgipa mandeni dokkanko chipe donattokaha.
Police-rangni u·iatani gitade, dos dakgipa mande da·o dipet kate dongenga indiba police-rang ia a·selni bidingo mokordomako segatenba, dos dakgipa mandeko rim·na sandiengaha.
“Dos dakgipa mandeko ta·raken rim·na man·na gita chinga sakkirangko sandienga. Mikkangchi iandakgipa a·selrang ong·taijana gita dos dakgipa mandeko rim·e chinga rakbatgipa sastirangko on·gen. Ia a·selni bidingo police-rangna u·iatahani gimin chinga jolni manderangko mittelna ska,” ine West Garo Hills a·jani Superintendent of Police (SP) Abraham T Sangma parakataha.
Niamrangko jaktango ra·jachina aro ia a·selko jako ra·na gita police-rangna on·chinaba ua jolni dingtang dingtang dolrangko aro jolo songdongenggipa manderangko didiataha.
“An·ching bakrime kamko ka·anichi pilaknan naljokaniko ra·bana man·gen,” ine Sangma parakataha.
Garobadha jolni dingtang dingtang dolrang aro jolo songdongenggipa manderang, Garobadha bazaar-o donggipa dokkan ge·sako chadrapeani ja·mansa ia a·selni bidingo ma·sina man·ahachim.
Social media-rango watpripraenggipa video-oniko niksona man·ani gitade, ia dokkanni skanggipa gadango palang dongachim aro ia dokkanni nokgipa, chatri saksako ong·gija dakna miksonge ia dokkanona okamatahachim.
Ia a·selni bidingo ma·sina man·ani ja·man jolni dingtang dingtang dolrang, ia dokkanko chipe donataha.
