Simarango chel·chakaniko bilakbatatna ma·mongni sipai dolrangko a·dok sorkari bi·dapa

SHILLONG: Sombar salo, Meghalaya a·dokni Chief Minister Conrad K Sangma aro Deputy Chief Minister Prestone Tynsong, Union Home Minister Amit Shah-ko New Delhi-o grongenba, Meghalaya aro Bangladesh a·songni simarango chel·chakaniko bilakbatatna gita sipai dolrangko on·dapatchina mol·molangaha.
Bangladesh a·songo so·sojengjeng ong·engani gimin Bangladesh a·songoni Meghalaya a·dokona napsrukbana man·jana gita simarango nirok sandianiko bilakbatatna, ma·mongni sipai dolrangko a·dokna on·dapatchina a·dok sorkari mol·molataha.
Union Home Minister Amit Shah-ko New Delhi-o gronge agangrikangani ja·man kobor ra·timgipa manderang baksa agangrikengon, Meghalaya aro Bangladesh a·songni simarango chel·chakanirangko bilakbatatna gita sipai dolrangko watdapatchina ma·mong sorkariko didiaha aro nangani kri ja·kurangko de·na gita Union Home Minister ku·rachakaniko on·ataha ine a·dokni Chief Minister Conrad K Sangma parakataha.
Chief Minister-ni parakatani gitade, Bangladesh a·songoni Meghalaya a·dokona napsrukbana man·jana gita BSF, Army aro Meghalaya Police-rangba bilaken nirok sandianirangko dakenga ine uamang Union Home Minister-na u·iataha.
“Meghalaya aro Bangladesh a·songni simarango chel·chakanirangko bilakbatatna gita night curfew-ko ra·gataha aro da·o dipet ia simarang gita manderangni re·ruraanirangko raken champengatahani gimin chinga Union Home Minister-na talate on·baaha,” ine Chief Minister aganaha.
Meghalaya aro Bangladesh a·songni simarango manderangni re·ruraanirangko da·o dipet sorkari chu·gimik champengatchengaha ineba Chief Minister parakataha.
Chief Minister Conrad Sangma aro Deputy Chief Minister Prestone Tynsong mang mijalo Finance Minister Nirmala Sitharaman-koba New Delhio grongenba New Shillong aro gipin biaprango bading-chiwalchakramrangko rikanio uni dakchakaniko bi·aha aro gital ramarangko tarina gita Externally Aided Projects (EAP)-oniko kror 2500 tangkarangko chamatani giminba FM-ko mittelaha ineba parakataha.