SHILLONG: Meghalaya a·dokni SSA skulrango non-teaching staff ba skiani ong·gijagipa kamrangko ka·enggipa manderangna dormahako bariatna gita sorkari, seachi ku·rachakaniko on·angahaon All Meghalaya SSA Non-Teaching Staff Association (AMSSAANTSA)-ni asonge jingjengataniko dontongatnaba dongaha.
Sombar attamo, AMSSAANTSA-ni membor-rang, Rationalisation Committee-ni tom·aniko ong·atanio dongpae bak ra·angaha aro ia tom·anio Education Department-ni Commissioner & Secretary Vijay Kumar Mantri aro gipin official-rangba dongpae bak ra·angtokaha.
Tom·a matchotani ja·man kobor ra·timgipa manderang baksa agangrikengon, ian ia committee-ni bon·kamgipa tom·ani ong·aha indiba uamang committee-ni aganchakanirangko chu·ongnikjaha ine AMSSAANTSA-ni president Jennifer J Synrem parakataha.
“Ia tom·anio Rationalisation Committee-ni chingna aganchakani aro ku·rachakanirangko chu·ongnikjaha indiba dormahako bariatna gita sorkarini on·enggipa proposal-ko ra·chakaignok,” ine ua aganaha.
Sorkarini seachi ku·rachakaniko on·kujaskalde uamang asonge jingjengataniko dontongkujawa ineba Synrem parakataha.
“Seachi ku·rachakaniko man·ahaosa chingni jingjengataniko dontonggen,” ine ua aganaha.
AMSSAANTSA president-ni aganani gitade, SSA-o non-teaching staff ong·e kam ka·enggipa manderangni dormaharangko bariatanichi a·dok sorkarina koros bate nangengani gimin uamang percentage-o pangchake dormahako bariatchina gitade sorkario dabijaha.
Mikkang bilsini financial year bon·ahaon ia committee, tom·e chanchirimangtaigen aro bilsibongaprakon dormaharangko committee nipilanggen ineba Synrem aganaha.
SSA skulrango non-teaching staff ong·e kam ka·enggiparang, an·tangtangni dormahako 80 percent-chi bariatchina dabitokengoba, kam ka·enggiparangna 25 percent-chi dormahako bariatna sorkari tik ka·ahani gimin AMSSAANTSA-ni membor-rang, re·anggipa July 31 tarikonin ari gri, Shillong songjinmani Madan Malki kal·chakramo jingjengatengachim ine nikna man·a.