TURA: West Garo Hills a·jani Raksamgre Civil Sub-Division-ni ning·o donggipa dingtang dingtang songrangona Assam a·dokoni manderang niam gri napsrukbae songdong a·chatokenga ine Raksamgre aro Pedaldoba-ni dingtang dingtang dolrang, chong·motan GSMC, GSU, APA, FAF aro ACHIK dolrang parakatenba, ia songrangona Assam a·dokoni niam gri napsrukanirangko mikrakbate nirokatchina a·dokni Chief Minister Conrad K Sangma-ko didiataha.
Iani bidingo a·dokni Chief Minister-na sedoatengon, bilsi 50 batpilengahaoba Meghalaya aro Assam-ni simarango neng·nikanirangko namatna man·chipkujaenga aro Raksamgre Civil Sub-Division-ni ning·o donggipa dingtang dingtang songrangoba salantian gita dake Assam-oni niam gri napsrukbae songdong a·chatokengani gimin ia jolrango songdongenggipa manderang neng·nikanirangko chagrongna nangenga ine Raksamgre aro Pedaldoba-ni NGO-rang parakataha.
“Meghalaya a·dokni ning·o donggipa Kharsengdap, Khokapara, Kalapara aro Bondukmali jolrango Assam-ni niam gri signboard songanirangko aro poster tapanirangko nikna man·pilengaha. Badiaba badiaba biaprangode Assam sorkari, bijoli krongrangko, ramarangko, skul nokrangko aro uandake dingtang dingtang kamrangko ka·engani a·sel jolo songdongenggipa manderang kenchipchipe janggi tangna nangtokenga,” ine ia NGO-rang parakatenba, iani bidingo ta·raken ja·kurangko de·china aro Assam-oni niam gri napsrukaniko champengatchina a·dokni Chief Minister-ko didiataha.