SHILLONG: Khasi aro Jaintia Hills a·jani dingtang dingtang biaprango IED boma gopretna miksongenggipa Hynniewtrep National Liberation Council (HNLC) bobil dolni mande sakgittamko Ri Bhoi a·jani police-rang rim·na man·aha.
Intelligence-oni u·iatanirangko man·soani ja·man police-rang, Mongolbar pringo, bilsi 31 ong·gipa Equest Langsiang-ko Nongpoh-ni Bethany Hospital Outreach bibraoniko rim·na man·aha aro ia mandeni mobile phone-oniko police-rang, HNLC bobil dolni sakkirangko man·aha. Sakkirangko man·ani ja·man police-rang ia mandeni kosako Nongpoh police station-o mokordomako ka·aha.
Ia mandeko rim·ani ja·man police-rang sing·sandion, ua an·tangko HNLC-ni membor ine ku·rachakaha aro Bangladesh-o dongenggipa bobil dolni manderang baksa IED bomarangko gopretna miksongengachim ine parake on·aha.
Ia mande, HNLC-ni gipin membor-rang baksa Khasi aro Jaintia Hills a·jani dingtang dingtang biaprango IED bomarangko gopretna miksongengachim ineba police-rangna parakaha. Ja·mano ua, an·tang baksa kam ka·rimenggipa gipin sakgni manderangkoba police-rangna parake on·aha aro uandaken sakgni manderangkoba police-rang rim·na man·aha.
Rim·ako man·gipa gipin sakgni manderangara, Nartiang-oni bilsi 31 ong·gipa Deiborlangki Sariang aro Laskein-oni bilsi 34 ong·gipa Markhlan Biam ong·achim aro uamangba an·tangtangko HNLC bobil dolni membor-rang ine police-rangna ku·rachakaha.
Bangladesh a·songo dongenggipa HNLC dilgiparangni ge·etanio pangchake uamang, re·anggipa August-ni 14 aro 15 tarikrango IED bomarangko gopretna miksongachim ineba ia manderang, police-rangna parake on·aha.