SHILLONG: Gambegre Assembly constituency-ni by-election-na National People’s Party (NPP), a·dokni Chief Minister Conrad K Sangma baksana sorkarini pilak dilgiparangkon jakkalengoba, Gambegre constituency-ni manderang, NPP-na pu·onjawa ine Sukrobar salo, a·dokni gitcham Chief Minister aro Trinamool Congress (TMC) parliamentary party-ni dilgipa Mukul Sangma a·kangataha.
“Gambegre constituency-o ong·enggipa obostarangko anga name nirikkienga aro angni nikanio NPP, a·dokni chief minister baksana sorkarini pilak dilgiparangkon Gambegre constituency-na jakkalenga,” ine Sangma aganaha.
By-election-ko ong·atna siengani gimin Gambegre constituency-o ong·enggipa obostarangni gimin janapatengon, “Ia constituency-ni bang·a nokdangrangnan CGI sheet-rangko sualaha. Ia CGI sheet-rangkoa sorkarini badiaba scheme-ni ning·osa man·na nanggipa nokdangrangna sualengama ma NPP-ni gitasa an·tangtang breenba manderangna sualengama, uko chinga sandigen,” ine Sangma parakataha.
“Ian NPP-ni Gambegre seat-ko chena krengstapenganiko mesokani ong·enga indiba constituency-ni manderang, uamangna namgipa aganchakaniko on·gen,” ineba ua aganaha.
NPP-chi dilenggipa MDA sorkarini ning·o bang·en ong·gija dakanirangko nikna man·enga ine janapatskaengon, iani bidingo uamang kakketko sandigen aro darangkoba jakgitele jokna on·jawa ine TMC-ni dilgipa parakataha.
“Sorkarini jako ra·enggipa scheme mingantion, ong·gija dakani aro mikkang niteanirang donga,” ine Sangma aganenba, mikkang nitee kamko ka·aniara tangka cha·aniko mesokanian ong·a ine Supreme Court-ni rai on·aniko gisik ra·atpilangaha.
Da·o ong·atna sienggipa Gambegre by-election-o a·dokni Chief Minister Conrad K Sangma-ni jikgipa Mehtab Chandee Sangma-ko NPP-ni candidate dake susaatengachim ine nikna man·a.
TMC-ni gitaba ia by-election-o a·dokni gitcham Minister Zenith Sangma-ni jikgipa aro Dengnakpara-ni MDC Sadhiarani M Sangma-ko susaatskana miksongengachim.
Sorkarini pilak dilgiparangkon NPP-na jakkalengoba Gambegre-ni manderang pu·onjawa: Mukul
Date:
Share post:
