Kamna ra·anio niamrangko pe·a ine matnangenggipani bidingo talataniko on·china Mukul dabia

SHILLONG: Dingtang dingtang kamrangna ra·anio niamrangko ja·rikjaengani a·sel chadamberangni gisepo neng·nikanirangko chagrongna nangtokenga ine matnanganirang ong·katahani gimin iani bidingo a·dokni manderangna talataniko on·china a·dokni TMC dol, a·dok sorkario dabiangaha.
A·doko dingtang dingtang neng·nikanirangko chagrongna nangengoba sorkari, ia neng·nikanirangko namatna changjaenga ine matnangatengon, “Adita jarangna skang ong·atanggipa parliamentary election-an iani sakki ong·a. Ian indita bilsirangna manderangni suk ong·gijaniko mesokanisa ong·aha aro ian a·dokna namen kragijani ong·a,” ine TMC parliamentary party-ni dilgipa Mukul Sangma, Tura Lok Sabha constituency-o NPP-ni amako man·ahani gimin toe janapataha.
Batanggimin somoirangoba chadamberangni gisepo ka·a ding·chaoanirangko ong·katahani a·selan niamrangko pe·anirang ong·aha ine janapatengon, “Ian an·ching pilaknan, mongsongbate sorkarina, kamrangko ka·e cha·na cholrangko sandienggipa manderangni gisepo ka·dongna man·aniko ra·bana nangani ong·a. Kam ka·e cha·na cholrangko sandienggipa manderango sing·e niaibo, unon an·ching kakketko ma·sina man·aigen,” ine Sangma aganaha.
Adita salrangna skang MPSC-o ong·gija dakanirangna matnanga man·gipani bidingo janapatskaengon, badia niamo result-rangko nipiltaienba mark-rangko on·dapna man·a ine sea donga jinmana mesokbo ine Sangma sing·doataha.
“Ian niamni kosako kal·stekaniko mesokanisa ong·a aro iani a·selan manderang, kamrango ra·ani niamrango ka·dongna man·tokjaenga,” ineba ua aganaha.
East Garo Hills a·jao District Selection Committee (DSC)-ni result parakaniko toe janapatskaengon, “Ia kamna porikka segipa nokdang ge·sani sakgittam membor-rang pass ka·aha ine porikkako segipa manderang angna aganaha. Uni gimin an·ching ia kamna ra·ani bewalrangko name nipilna nangchongmota. Ian MPSC ba DSC-na ong·china indiba pilakon kamrangko name ka·na nanga,” ine TMC-ni dilgipa aganaha.
Iandake kamna ra·ani niamrango chadamberangni ka·dongna man·jaenganiara namen kenna nangani ong·enga aro sorkari iarangni bidingo manderangna talataniko on·na nangchongmota ineba Sangma aganaha.