Resubelpara: Horti-agri product ba bosturangko maidake namdapatna man·gen, iani gimin u·ianiko gipatna miksonganio District Horticulture Office, Resublepara, North Garo Hills, IBDC, Sambrak-o game cha·giparangna, entrepreneur-rangna ‘value addition of fruits and spices’-o seminar-ko Sukrobar salo ong·ataha.
Tom·anio chief guest ong·e bakko ra·e aganprakmitingo Kharkutta C&RD BDO Dr. Bontina G Momin, a·doko ge·e game man·gipa bosturang bang·en donga, uarangko namdapata ong·ode game cha·giprangni man·gniko baridapatna cholrang bang·a aro game man·gipa namnamgipa bosturangko manderang sanditokaia, ine aganaha.
Bang·bata bolam-biterang aro moslarangko indinaride ru·ute somoirangna donkamna man·ja, indiba value added product ba bosturangko ru·utbate somoina jakkalna ba donna man·skaa, indake bilsi karini a·bachengaoni bon·kama somoiona man·a ama.
Indake Dr Bontina Momin, tom·anio bak ra·giparangko bite aro mosla ge·giparang aro value addition-ni business-o donggiparangna dakchakgrikchina mol·molaha.
Value addition-ni gimin janapataon, ADH, DHO Salma Momin-ba indine aganaha, “a·baoni man·gipa bosturangko jol dake bajarona ra·ange palaon game cha·giparangna bang·e kamaianiko ra·baja indiba ua bosturangkon value addition ka·ode bajaro nambate kamaina man·a.
Programko Mission for Integrated Development of Horticulture (MIDH)-ni ning·o ong·ataha. Ian game cha·giparang, entrepreneur-rangni man·gniko duna gni bate baridapatna miksonganio a·bachengatgipa ma·mongni scheme ong·a.
Programo game cha·giparang, entrepreneur-rangna value addition product-rangni gimin skie on·angaha. Maidake ge·e game man·gipa e·ching, holdi, golmoris, dalchini, te·brong, te·rik ba uandakgiparangko achar, candy, jelly-jam, juice, powder ba ginde-tariskana man·gen iarangni gimin skie on·angaha.
