SHILLONG: Salgittam Congress MLA-rangni National People’s Party (NPP)-o napanganiara niam gita ong·aia ine Sombar salo, Trinamool Congress (TMC)-ni state president Charles Pyngrope parakataha.
Pyngrope-ni aganani gitade, ia sakgittam MLA-rangko Congress dolni gita ra·galgenchimoba Assembly-ni gitade uamangko ra·galkujani gimin uamang NPP-o napna man·aia.
“MLA sakgniko Assembly-ni Speaker-sa suspend ka·na bil donga,” ine TMC-ni president, kobor ra·timgiparangna parakataha.
Congress dolni suspend ka·anide ia membor-rangni MLA ong·anio maming nangchakeaniko ra·bana man·ja ine janapatengon, “Sakgittam Congress MLA-rangni NPP-o napaniara Anti-Defection Law-ni Tenth Schedule-o pangchake bakgittamoni bakgnini bakrimaniko chu·sokatani gimin anga an·tangde uamangni NPP-o bakrimaniko niamo ong·aia ine aganaigen,” ine Assembly-ni gitcham Speaker Pyngrope aganaha.
Gipin dolrangni MLA-rangko rime kata ine NPP-ko matnangenggipani bidingo sing·skaon, ia sakgittam Congress MLA-rangkode rime kata ine aganna man·jawa ine Pyngrope aganaha.
Anti-Defection Law-o dongimin niamrangko chu·sokatani ja·mansa Congress dolni gitcham sak 12 MLA-rangba TMC-o napaha ineba ua gisik ra·atpiltaianiko on·angaha.
“Ianoba obostarang apsanaia. Party-oniko suspend ka·a ba dontongata inani ortode uamang party-ni kamrango bak ra·na man·jaha indiba uamang Assembly-ode bak ra·na man·kuaigen. Assembly-o party-ni bilkosa speaker-de nichenggen aro ia bil, Tenth Schedule Act-ni niamrangko pe·a dongjagenchimode uamangni gipin dolrango napaniko Speaker-ba ra·chakna nangaia,” ine TMC-ni state president aganaha.
Sakgittam Congress MLA-rangni NPP-o napna skang, ia sakgittam MLA-oni sakgnikosa MPCC suspend ka·aiahani gimin ia MLA-rangni NPP-o napani niamrangko a·dokni gitcham Chief Minister aro TMC-ni dilgipa Mukul Sangma-ba sing·doatahachim.