Shillong: Songadam-nokadamrango bijoli sisimsimaniko aroba transformer nosto ong·anirangko Sorkari nirokatna nangchongmotenga, jeni a·selan bading-chiwalani a·baoba neng·nikataniko man·enga ine Sohra NPP MLA, Gavin Miquel Mylliem House-o Butbar salo aganaha.
Batanggimin jarangosan uni constituency-ni ning·on, adita songrangni transformer-rang nosto ong·aha, indake songni-nokni manderang, uarangko taripile on·aniko adita anti ba jasarang ong·pile sengna nanga ineba ua aganaha.
Indake MeECL-ko chalaianio, subdivisional level ba gadango kam ka·giparangni chu·ongjani a·sel kamrangko chu·sokatanio ja·manchakatako man·enga, Sohra NPP MLA aganaha.
Uni aganani gitade. kamoni neng·takgimin aro mitam sianggipa staff-rangni bangbang donggipa biaprango MeECL, manderangko gapatjaengani a·sel kam ka·giparang chu·ongjaenga, jeni a·selan lineman-rangna kamrang biljimenga aro bang·a bijoli ra·gipa nokdangrangko nirokna nangenga.
“MeECL-ni skanggipa kamko jakdangdike kam ka·gipade lineman-an ong·a, uako ma·sina nanggen, jemangchin, manderangna corporation-ni dangdike on·anio tongtong nangchakea, Sohra MLA aganaha.
Unomitingo, MeECL-ni tangka-paisao neng·nikanirangko chagronganikoba ua u·ienga ineba ua a·kange aganaha.
Iarangni bidingo aganchakengon, Sohra legislator-ni agananirangko anga ra·chaka, maina anga an·tangba songadam constituency-ni MLA-an ong·a ine Power Minister, Abu Taher Mondal aganchakaha.
Apsandakgipa neng·nikanirangko a·dokni bang·a kona-noksikrangon chagrongenga ineba Minister aganaha.
Indake ong·engon, a·dokni pilak biaprangon bijoliko maming ja·manchakatani gri on·na gita Sorkari pilakni gitan cholrangko nigamenga aro kang·kare kaenga ineba Power Minister ka·dongataniko aganaha.
