SHILLONG: Dadenggre Sub-Division-ni ning·o skigipani kamna ra·anio ong·gija dakaniko sandirokna a·bachengataha aro iani bidingo sandirokenggipa inquiry committee-ni preliminary report-koba on·manahani gimin da·o ia report-ko nipilahaon nanga gita ja·kurangko de·anggnok ine Bristibar salo, a·dokni Education Minister Rakkam A Sangma parakataha.
Assembly-ni Autumn Session-o Voice of the People’s Party (VPP)-ni MLA Ardent Miller Basaiawmoit aro gipin membor-rangni sing·anina ua ia kattarangko aganaha.
Education Minister-ni parakatani gitade, kamna galgipa candidate sakgni, chong·motan Haidar Hussain Mollah aro Md Saddam Hussain, tol·gipa D.El.Ed certificate-rangko on·aha ine matnanganirang ong·katahani gimin iani bidingo sandirokna gita membor sakgittam donggipa inquiry committee-ko songaha aro ia committee-ni preliminary report-ko da·o sorkari niengaha.
Iandake matnanganirangara namen chanchibewalna nanggipa ong·a ine nikenba, chong·motan West Garo Hills a·jani District School Education Officer (DSEO)-ko chairman dake aro Tura-ni Sub-Divisional School Education Officer baksana Ampati-ni SDSEO-ko membor dake committee-ko songaha ineba Sangma parakataha.
Ia committee-ni mongsonggipa daitoara, Haidar Hussain Mollah aro Md Saddam Hussain-ni on·gipa certificate-rangko name nipilanian ong·a ine janapatskaengon, committee-ni sandie man·aniko on·ani aro nanga gita ja·kurangko de·na ku·pattianirangko on·aniba ia committee-ni daitoan ong·a ine Education Minister parakataha.
Matnangako man·gipa candidate-rangba, sakgipin Istiak Alom minggipa mandeni kosako badi ka·skaaha ineba ua aganaha.
Lekka porani on·ani kamrangko nambatatna man·na gita uni kamrango Assembly-ni pilak membor-rangkoba bakrimchina gita Sangma didiataha.
 |
ReplyForward
|