GHADC-o kam ka·enggiparangni dormahako on·china Kharkutta MDC dabia

TURA: Garo Hills Autonomous District Council (GHADC)-o kam ka·enggiparang, ja 34 ong·pile dormaharangko man·tokkujaengani gimin Non-Gazetted Employees Association (NGEA), jingjengatanirangko dakengani gimin kam ka·enggipa manderangni neng·nikanirangko niatchina gita GHADC-o Opposition dolko dilenggipa aro Kharkutta-ni MDC Cherak W Momin, GHADC-ni Chief Executive Membor (CEM) Albinush R Marak-na sedoataha.
An·tangtangni man·na nangkuenggipa ja 34-ni dormaharangko on·china aro dormahako Fifth Pay Commission-ni ku·pattianiko pangchake on·china dabie, NGEA-ni membor-rang, jingjengatanirangko dakengachim ine nikna man·a.
Iani bidingo GHADC-ni CEM-na sedoatengon, GHADC-o kam ka·giparangna Fifth Pay Commission-ni ku·pattianio pangchake dormaharangko on·na gita 2018 bilsini March 19 tarikon GHADC-ni Secretary ge·etanik on·manahachim indiba da·alona kingkingan GHADC-o kam ka·giparangna Fifth Pay Commission-ni dormaharangko on·kujaenga ine Momin parakataha.
Kam ka·giparangni dabianirangko chu·sokatchipjaengani a·selan kam ka·giparangni gisepo suk ong·gijanirang batroroengaha ine janapatengon, GHADC-o kam ka·enggipa manderangni neng·nikanirangko namatna man·na gita ta·raken bangki dormaharangko on·china aro Fifth Pay Commission-ko ra·gatchina GHADC-ni opposition dilgipa, CEM-ko didiataha.
Indake ong·engon, re·baenggipa September-ni 2 tariko, NGEA-ni dilgiparang aro GHADC-ni dilgiparang Secretary-ni office-o tom·e chanchirimna sienga ine kobor man·soaha.