Tura: West Garo Hills-ni dingtang dingtang Civil Society Organisation (CSO)-ni dilanio Rajabala -Selsella – Balachanda ramako tarichina aro Selsella-o ATM-ko songchina dabie re·jomaniko dakangaha.
Ramani obosta bilonge namja, batanggimin bilsi brioni ramako tarigija donenga. Adita salrang skangsan Garobada -oni Selsella-ona re·gipa ramako BRC taria matchotaha da·ode ua rama namjok. Indiba bang·a jolni ramarangan namgija obostao ong·enga.
Rally-o sak hajal manderang bak ra·tokaha. Uamang Selsella-o ATM-ko songchina aro ramako tarie on·china dabie jingjengataha.
“A·dokni gipin bakrangona bate ia jolon namjabatgipa rama ong·a, jekon ru·uta bilsirangoni tarichipgija donenga. Uni gimin chinga daitoko jako ra·e kam ka·gipa department-ko ia mamlako nirokatchina mol·molatenga. Rajabala- Balachanda aro Selsella ramako ta·rake tarie on·china mol·molata, ine ua jolni CSO aganaha.
