SHILLONG: Meghalaya a·dokni bang·bata biaprangon Jal Jeevan Mission (JJM)-ni kamrangko name chu·sokatja ine matnanganirangko nikna man·engoba, da·o dipet a·dok gimikni 5,23,600 nokdangrangna chirangko sale on·na man·aha ine a·dok sorkari a·kangatskaaha.
Sorkarini see rakkianiko parakani gitade, ia 5,23,600 nokdangrangoni 15,700 nokdangrangde East Jaintia Hills a·jao, 81,145 nokdangrangde West Garo Hills-o, 43,116-de West Jaintia Hills-o, 1,08,120-de East Khasi Hills-o, 17,688 nokdangrangde South West Khasi Hills-o, 52,776-de Ri Bhoi a·jao, 34,696 nokdangrangde North Garo Hills-o, 30,403 nokdangrangde West Khasi Hills-o, 26,843 nokdangrangde Eastern West Khasi Hills-o, 42,819 nokdangrangde South West Garo Hills-o, 36,115-de East Garo Hills-o aro 34,179 nokdangrangde South Garo Hills a·jao ong·a.
Ia nokdangrang, JJM-ni ning·o litre 55 chirangko salprako man·enga ineba sorkarini data-o parakaha.
Je nokdangrangan JJM scheme-ni ning·o biming segatako man·eba scheme-ko matchotani ja·man chi pipe-rangko man·kujaengachim, an·tangtangni neng·nikanirangko PHE department-na badi ka·ena gita man·gen.
Meghalaya a·doko JJM-ni kamrangko name chu·sokatjaengani gimin batanggimin somoirango a·dokni BJP, bang·en matnanganirangko dakahachim aro JJM-ni kamrangko name chu·sokatjaengani a·sel manderang chirangko man·tokjaenga ine parakahachim.
Apsan daken a·dokni dingtang dingtang biaprango, mongsongbate Garo Hills-o JJM-ni kamrangko name chu·sokatjaengani gimin dingtang dingtang dolrang aro social activist-rangni lekka sedoanirangkoba nikna man·skaengachim.
Dingtang dingtang dolrang aro social activist-rangni parakani gitan, bang·bata songrangon chi pipe-rangko sale on·genchimoba chi jokgijanirangko, chi tengki donggijaniko aro mitam songrangode JJM-ni kam matchotaha ine report-ko on·engoba biapona re·ange nigenchimode maming kamrangkon nikna gita man·skakujaengachim.