SHILLONG: Meghalaya a·dokni skotong Shillong songjinmao donggipa private hospital-rang, Megha Health Insurance Scheme (MHIS)-ni kamrangko a·bachengpiltaina tik ka·angaha.
Mongolbar salo dingtang dingtang private hospital-ko chalaienggiparang, Nazareth Hospital-o tom·e chanchirimangani ja·man, MHIS-ni kamrangko a·bachengpiltaina tik ka·angaha.
Kobor on·timgiparangni u·iatani gitade, ia private hospital-rango MHIS-ni kamrangko dontongatani a·sel BPL nokdangrangoni re·bae sanna bananirangko ra·enggipa manderang neng·nikanirangko chagrongna nangtokengani gimin Shillong songjinmani bang·bata private hospital-rangon MHIS-ni kamko a·bachengpiltaina tik ka·angaha.
September 1 tarikonin private hospital-rango MHIS-ni kamrangko dontongna tik ka·ahani a·selan Sombar aro Mongolbar salrango surgery dakna nanggipa manderangde ra·doatna nangao ga·aktokaha ineba kobor on·timgiparang parakataha.
Ia a·selan dialysis-ko dakenggipa manderangba nangchakeaniko man·aha ineba ua aganaha.
“Meghalaya a·doko bang·a manderangan sanna bananirangko ra·anio MHIS-osa pangchaktokengani gimin da·o MHIS-ko dontongatahaora neng·nikanirangko chagrongna nangtokengahani giminsa chinga manderangni namgnina ia scheme-ko a·bachengpiltaina tik ka·aha,” ine Shillong-o private hospital-ko chalaienggipa mitam manderang parakataha.
Indake ong·engon, an·tangtangni neng·nikanirangko somoi gita namatchina didie, private hospital-ko chalaienggipa manderang, a·dok sorkarina sedoatna gita tik ka·angskaaha.
Koborko on·ani gitade, a·dokni private hospital-rang, MHIS phase IV-ni tangka paisarangkon da·onan man·tokkujaengani giminsa uamang ia scheme-ko dontongna tik ka·ahachim.