TURA: India a·songni gipin biaprango gitan chang 63-gipa Teacher’s Day ba Skigiparangni Salko Bristibar salo, Meghalaya a·dokni dingtang dingtang biaprangoba maniangtokaha.
Shillong-o ia chang 63-gipa Teachers Day-ko Meghalaya sorkarini School Education & Literacy Directorate-ni gita U Soso Tham Auditorium-o maniangaha aro ia salko manianio, a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia salko manianio a·dokni Education Minister Rakkam A Sangma, Education department-ni Commissioner & Secretary Vijay Kumar Mantri, School Education & Literacy-ni Director Swapnil Tembe, dingtang dingtang skul aro college-ni principal-rang, skigiparang aro chatro chatrirangba bak ra·angtokaha.
Ia Skigiparangni salko manianio a·dokni Chief Minister, CM Impact Guidebooks, SSA-ni ning·o Science & TLM Kits, DERT-ni tarigipa Bagless Day-ni niamrang, aro PM Poshan-ni ning·o Nutrition-ni gimin segipa lekkakoba oprake on·angjolaha.
Ia tom·anio a·dokni Chief Minister, jinmana aganprakengon, a·dokni chadamberangna a·gilsakni seng·aniko on·na gita an·tangtangko on·kange kam ka·engani gimin skigiparangko mittelpilangenba, a·doko lekka porako tang·doatna gita sorkarini ka·enggipa kamrangni gimin aganangaha.
Ia bilsini Teachers Day-ko manianio a·doko National Award-ko saksa, State Award-ko sak 14 aro District Award-rangko sak 36 skigiparangna on·angaha.
Indake ong·engon, ia chang 63-gipa Teachers Day-ko Tura-ni District Auditorium-oba maniangaha aro ia salko manianio, Meghalaya Board of School Education (MBOSE)-ni Executive Chairman CP Marak, mongsonggipa sokgipa ong·e bak ra·angaha.
Ia salko manianio, MBOSE-ni Controller of Examinations TR Laloo, School Education & Literacy-ni Joint Director RTK Sangma, Sub-Divisional School Education Officer (SDSEO) Samuel Ch Marak, Dadenggre-ni SDSEO ED Sangma, dingtang dingtang department-ni official-rang, principal-rang, skigiparang, chatro chatrirang aro gipinrangba bak ra·angtokaha.
Ia tom·anio, MBOSE-ni Executive Chairman CP Marak, jinmana aganprakangengon, an·tangtangko on·kange skigipani kamko ka·engani gimin skigiparang pilakkon mittelpilangenba, ia salo award man·gipa skigiparangnaba an·tangni namgipa skaniko on·angaha.
Songsalo mandeko saksa chanchina changgipa aro songsalna on·gilgipa ong·atanio skigiparangni kamrangkoba ua ia tom·anio janapangaha.
Ia sal somoirango skigiparang dingtang dingtang neng·nikanirangko chagrongna nangenga ine janapatengon, mikkangchi chatro chatrirangko mande ong·atna gita an·tangtangko on·kange kamko ka·angkuchina gita Marak, skigipa sakantikon didiangaha.
Ia bilsini State Award-ko man·gipa West Garo Hills a·jani skigiparangara, Tura Don Bosco Higher Secondary School-ni Assistant Teacher Subrata Sen aro Tura Balsrigittim LP School-ni Head Teacher Miman M Sangma ong·a aro District Award-ko man·gipa skigiparanga, Dalu Sacred Heart Deficit Secondary School-ni Headmaster Rev Fr Biju Paul, Shyamnagar Govt UP School-ni Headmaster Utpal Kr Laha aro Ampanggre Govt LP School-ni Assistant Teacher Alithson G Momin ong·a.
Best Scout Master-ni award-ko Tura Scouts Open Unit-ni Scout Master Suraj D Marak-na on·aha, Best Guide Captain-ni award-ko Tura Christian Girls HS School-ni Assistant Teacher aro Guide Captain Benjish N Marak-na on·skaaha.
District Auditorium-o jinma tom·e skigiparangni salko manina skang, skultangtangoba skigiparangko mande ra·pilskana gita dingtang dingtang program-rangko ong·attokaha.
Apsan daken, ia chang 63-gipa Teachers Day-ko South West Garo Hills a·jaoba maniangaha aro ia salo award man·gipa skigiparangna dingtangmancha mande ra·pilskaanirangko dakangaha.
Ia Teachers Day-ko South West Garo Hills District School Education Office-ni gita Ampati-ni Multi Facility Centre-o manidilaha aro ia salko manianio, Mahendraganj-ni MLA Sanjay A Sangma, mongsonggipa sokgipa ong·e bak ra·angaha.
Ia skigiparangni salko manianio award-rangko man·gipa skigiparangara, Boldamgre Deficit Secondary School-ni Assistant Teacher Sanjib A Sangma, Ampati Deficit UP School-ni Headmaster Grebingham B Sangma aro Kukurmua Govt LP School-ni Headmaster Jahan Miah ong·a.
Una agreba, Garobadha-o donggipa St Dominic Savio HS School-ni Assistant Teacher aro Scout & Guide Teacher Victor Dorana T Sangma-na Best Scout Master aro Ampati-o donggipa Birin Nuchong Sec School-ni Assistant Teacher aro Guide Captain Silje Ch Momin-na Best Guide Captain-ni award-rangko on·angskaaha.