SHILLONG: Shillong songjinmani Rynjah police station-ko kerosene bomachi godapgipa manderangko salsaode rim·na man·gen ine Shillong-ni police-rang ku·rachakaniko on·angaha.
Rynjah police station-ko batanggimin somoirangoba ong·gija dakgipa manderang kerosene bomachi godapahachim aro adita salrangna skangsan ia police station-ko apsan daken kerosene bomachi godaptaiahachim.
Ia Rynjah police station-ara noksikosa ong·ani gimin ong·gija dakgipa manderang pangnan ia police station-ko bomarangchi godapna jotton ka·rongengakon ine East Khasi Hills a·jani Superintendent of Police (SP) Sylvester Nongtnger parakataha.
“Ia a·selni bidingo chinga mokordomako segataha aro iani bidingo am·sandianirangko dakna a·bachengaha. Dos dakgipa manderangko chinga da·al ba knal rim·na man·janaba gnang indiba salsaode ia manderangko chinga rim·na man·telaigen,” ine SP aganaha.
Ia a·selni bidingo da·o dipet police-rang darangkoba rim·kujaenga ine janapatengon, Meghalaya Police-o sipairangko rimdapna gita porikka, training aro dake nianikoba nangani gimin komibeoba bilsi gittamde nangaia ine Nongtnger parakataha.
“Chingo sipairang chu·ongjagenchimode je sipairang chingo donga, uchin chinga kamrangko ka·aigen. Je manderangan ong·gija kamrangko ka·engachim, uandakgipa manderangni kosakode police-rang ja·kuko de·na nangaigen,” ine SP aganaha.
A·doko songdongenggipa manderangni naljokgnina police-rang kamrangko ka·enga ineba East Khasi Hills a·jani SP parakataha.