SHILLONG: Meghalaya politics-o Vincent H Pala-ni dilanio Congress-ni dilgiparang komiangrikrikani gimin Meghalaya Pradesh Congress Committee (MPCC) chief ong·aoni ong·katna nangnikani bidingo sing·anirang nakataha.
Congress changsade a·doko bilakgipa dol ong·achim, indiba da·ode Congress-ni obota namjaenga. Ian bilsi 2021 August jaoni Pala-ni MPCC chief-ni kamko jako ra·oni a·bachengaha.
Bilsi 2022-o gitcham Chief Minister Mukul Sangma-ko man·gope sak 12 MLA-rangko Congress gimataha, uamang Congress-oni ong·kate Trinamool Congress-o napangskaha.
Uni ja·man sakbonga MLA-rangko suspend ka·aha ba dondipataha, uamang 2023 Assembly election-na skangmangmang party-oni ong·kate gipin party-o napangskaha. Sakbonga MLA-rangko NPP-ni dilenggipa 1.0 sorkarina chakpaani gimin suspend ka·aha.
Assembly election matchota ja·man Khasi Hills Autonomous District Council (KHADC)-oni bang·a Congress MDC-rang party-oni ong·kate NPP-o napangaha.
Mejaomangmang sakgittam MLA-rang Celestine Lyngdoh, Gabriel Wahlang aro Charles Marngar- uamangba NPP-o napaha. Da·ode Congress-o saksamangmangsan MLA dongaijok, uan Ronnie V Lyngdoh ong·a.
Sakgittam MLA-rangni NPP-o napangaon Pala, MPPC chief ong·aoni ong·katna nangahachim ine Congress-ni mitam dilgiparang aganaha.
“Congress party-o indita so·sojengjeng ong·engon Pala, kamtangko jako ra·kuenga, party-ko bilake aro apsan ong·ate rakkina chu·sokjani gimin Pala, ong·katna nanga ine Congress dilgipa aganaha.
Party-ko tangchapiltaiatna nangenga, maina KHADC aro Jaintia Hills Autonomous District Council-ni election sepangjok. AICC, rakgipa ja·kuko de·na nangenga, party-na gital president-ko nangenga ine Congress dilgipa aganaha.
