TURA: Adita salrangna skang, Tura Civil Hospital (TCH)-ni Lab technician-rangko kamo ra·anio Meghalaya a·dokni Job Reservation Policy-ko ja·rikjaha ine A·chik Conscious Holistically Integrated Krima (ACHIK) Krima Council matnangatenba, ia kamrangna ra·aniko den·galpilenba gital dake aro Reservation Policy-o pangchake kamo ra·piltaichina Health Services (MI)-ni Director-ko didiataha.
ACHIK Krima Council-ni parakatani gitade, Tura Civil Hospital-ni lab technician-rangko kamo ra·anio Job Reservation Policy-ko ja·rikgija kamo ra·ahani a·sel joltangni chadamberangde kamrangko man·rikpajahachim aro gipin biaprangoni candidate-rangsa kamrangko man·tokaiahachim.
“Ia kamna candidate-rangko seokanio Job Reservation Policy-ko ja·rikjahani a·sel mitam kamrangko gipin biaprangoni manderangsa man·tokaha ine chinga koborrangko man·soaha. Meghalaya a·doko songdongenggipa Tribal jatrangna apsan cholrangko on·na miksonganiosa ia Job Reservation Policy-ko tariahachim indiba iandake joltangni candidate-rangna cholrangko on·chenggija gipin biaprangoni re·bagipa candidate-rangna kamko on·aniara Reservation Policy-ni niamrangko pe·asan ong·aigija joltangni chadamberangna kamrangko ka·e cha·na chol on·gijaniba ong·a,” ine ACHIK Krima Council-ni dilgiparang parakataha.
Tura Civil Hospital-o lab technician-ni kamrangko gipin biaprangoni re·bagipa candidate-rangna on·aniko den·galpilchina aro Job Reservation Policy-o pangchake ia kamrangna gital dake candidate-rangko seokpiltaichinaba ACHIK-ni dilgiparang, Health Services (MI)-ni Director-ko didiataha.
Kamna candidate-rangko ra·anio pangnan parake dakchina aro joltangni candidate-rangna cholko on·na man·na gita jinmana u·iatchengchina gitaba ACHIK dabiangaha.
Tura Civil Hospital-o lab technician-rangko kamo ra·engon, nanga gita poraia gadang donggipa joltangni candidate-rangna skanggipa cholrangko on·chengchina gitaba ACHIK dabiangaha.