SHILLONG: Meghalaya a·doko dingtang dingtang project-rangni bidingo NPP-chi dilenggipa MDA sorkari, manderangna parakatanirangko dakrongengoba da·onan Shillong Ropeway project-ni kamrangko a·bachengchipkujaenga ine nikna man·aha.
Ia project-ko a·bachengatani gimin adita bilsirangna skangan MDA sorkari parakatmanahachim indiba da·alonan ia project-ni kamrangko nikna man·kujaenga.
Ia Shillong Ropeway project-na pangchakaniko ia bilsini January jaosan a·songni President Droupadi Murmu songe on·angahachim indiba da·o jaskuni ja·manoba ia kamrang basako a·bachenggen aro ia project-ara chu·sokbebegenma darangba aganna man·kujaenga.
Ia project-ni kamrangko baditaba jarangna skangan a·bachenggnok ine u·iatahachim indiba kamrang chu·sokchipkujae da·o ia project-ni kamrangko October jaoni a·bachenggnok ine sorkari parakatskaaha.
Apsan daken, Shillong Smart Road project-ni giminba sorkari batanggimin bilsirangon parakatahachim aro ia project-ni ning·o bang·a ramarangkon tarina ku·rachakahachim. Indake ong·genchimoba, bilsisa batpile Lachumiere-o mongsonggipa ramako chipe donani ja·man ia Smart road-ko tarina chol ong·jawa ine da·o galchipskaaha. Ia ramako tarina man·jawaha ine parakatani ja·man mikkangchi mai ja·kurangko de·gen uni giminba maming u·iatanirang dongjae da·o ia rama tong·sakode tarie donenba kamrangko matchotgija donahani gimin jolni manderang suk ong·gijaniko paraktokaha.
Ia bilsini February jaoba a·dok sorkari, Wahumkhrah Riverfront project-na pangchakaniko songahachim aro da·o ia project-ni bidingo parakataoni jachet ong·pilengahaoba maming kamrangkon nikna man·skakujaenga.
Una agreba, Barik-oni Police Bazar-ona Skywalk project-ko tariani giminba Chief Minister an·tangan a·dokni manderangna parakatahachim indiba da·o ia kamrangko a·bachenggenchimode traffic jam ong·anirang bilonggen ine kamrangko galchipskaengaha.
