SHILLONG: Meghalaya Pradesh Congress Committee (MPCC)-ni president Vincent H Pala-ni biapo gipin dilgipako seokskaani bidingo AICC-ni general secretary Meghalaya in-charge Dr A Chella Kumar, mamingkoba aganna gita jechakaha.
MPCC-ni president Pala-na dongimin bils gittamni term August jaon bon·ahachim maina uko 2021 bilsini August jaon MPCC-ni president songahachim ine nikna man·a.
Iani bidingo kobor ra·timgipa mande baksa ku·siliting gita agangrikatengon, Pala-ni biapo MPCC-ko dilna gita AICC gipinko seokgenma ine sing·anina mamingkoba aganna gita Kumar jechakataha.
Meghalaya a·doko Congress dolko mangrakbatatna gita AICC miksongenga inesa ua aganaiaha.
Pala-ni MPCC-ko dilengmiting somoion Congress dolni bang·bata dilgiparangan wate kattokahani gimin iani bidingo AICC maiko chanchia ine sing·on, da·o dipet ua mamingkoba aganna gita man·kujawa inesa Meghalaya a·dokni AICC general secretary in-charge parakataha.
“Shillong-ona re·angahaon anga ia pilaknan aganchakanirangko on·gen,” ine Kumar aganaha.
Indake ong·engon, NPP-o napanggipa MLA sakgittam, chong·motan Celestine Lyngdoh, Gabriel Wahlang aro Charles Marngar-ni kosako Meghalaya High Court-o case ka·na gita uamang kamrangko ka·enga ineba Kumar parakataha.
Ia MLA sakgittamko chinga suspend ka·manaha aro uamangni kosako chingni ja·ku de·aniko na·simang bakan ma·sina man·aigen,” ine ua aganaha.