TURA: East Garo Hills a·jani Nengkra songo Eklavya Model Residential School-ko rikna pangchakaniko songe on·angani ja·man da·ona kingkingan ia skulko rikgija galchipe donenga ine Garo Students Union (GSU) Nengkra regional unit parakatenba, iani skulko rikani bidingo talataniko on·china a·dokni Chief Minister Conrad K Sangma-ko didiataha.
GSU Nengkra regional unit-ni president Ringrang M Sangma-ni parakatani gitade, Nengkra songo Eklavya Model Residential School-ko rikna gita songni Nokma aro maharirangan biapko on·ahachim aro 2019 bilsini March 5 tarikon ia skulko rikna gita pangchakanikoba Williamnagar-ni MLA aro da·o Cabinet Minister ong·enggipa Marcuise N Marak songe on·angahachim.
Indake ong·genchimoba, ia skulko da·alona kingkingan rikna kamrangko a·bachengkujaenga ine GSU Nengkra regional unit-ni president, suk ong·gijaniko parakataha.
“Ia skulko rikna pangchakaniko songe on·angaoni da·o bilsi bonga batangpilengaha indiba da·alonan kamrangko a·bachengkujaenga. Ia Eklavya Model Residential School-ko Nengkra-o kulianichi ian wilwilao donggipa chatro chatrirangnasan namgni ong·jawa indiba Meghalaya a·dok gimiknan namgni ong·genchim,” ine GSU Nengkra unit-ni president parakataha.
Ia EMRS-ko bimang pil·ate on·jagenchimode ian Nengkhra jolo donggipa manderangkosan togia ong·jawa indiba Meghalaya a·dok gimikni manderangkon togia gita ong·gen ineba GSU Nengkra regional unit-ni president parakataha.
Ia EMRS-ko Nengkra songo ta·raken rikna a·bachengatchina sorkariko didiatengon, ia skulko rikani bidingo chu·ongnikani gita aganchakaniko on·na man·genchimode on·gimin bilo pangchake nanga gita ja·kurangko de·anggen ine GSU Nengkra regional unit-ni president mikrakataniko on·angaha.