TURA: South Garo Hills a·jao ramarang namjani a·sel Sombar pringo, an·o donggipa me·chik saksako Tura-ona salbaenggipa ambulance gari bolsa, Gasuapara samba jolo donggipa Cherengpara songo kontasa batpile naptome dongna nangaha ine kobor on·aha.
Koborko on·ani gitade, South Garo Hills a·jao an·o dongenggipa me·chik saksako an·chi ong·rurue saengani gimin nambate sannaniko on·na gita ambulance-o Tura-ona ra·baengachim indiba ramarang a·dubekrara dakani a·sel ia ambulance a·dubeko kontasa batpile naptome dongna nangaha.
Indake ong·genchimoba ja·mano A·chik Holistic Awakening Movement (AHAM) Dalu unit-ni president Cham Cham N Sangma, iani bidingo koborko man·soenba ta·raken ua biapona re·bae, songni manderang baksa ia ambulance-ko jitatna man·aha aro rasong gnangbee ia me·chik a·sel ong·gnioni jokaha.
Iandake rama jal·langrang namjani gimin an·tangni suk ong·gijaniko parakatengon, ia me·chik somoi gita hospital-ona sokangna man·jagenchimode sawa daiko ra·genchim ine AHAM Dalu unit-ni president sing·doatenba, ia rama jal·langrangko ta·raken tarichina sorkariko didiataha.
