SHILLONG: Meghalaya a·doko lekka porani gita ja·manchakengani a·selrang, mongsongbate skulrango poraianirangko dontongani, skigiparang an·tangtangni pal sakgipinko skiatani, skul nokrangni namgijani aro uandakgipa a·selrangko ma·sie ra·na gita Education department bakan committee-ko songgen.
A·dokni Education Minister Rakkam A Sangma-ni u·iatani gitade, ia committee-ni membor-rang, dingtang dingtang skulrango ong·enggipa obostarangko ma·sie ra·na gita a·dokni skul ge·antionan re·anggen aro ja·mano report-ko tarienba department-na on·atgen.
Bang·a skulrangon, chatro chatri donggijagipa, poraia dontonggipa, skigiparangni pal kam ka·enggipa aro chatro chatrirangna bate skigiparang bang·bataniko nikna man·enga ine ku·rachakangengon, a·dokni lower primary skulrang nangani kri gadangona sokdojaenga ine Education Minister parakataha.
Skulrango poraia dontongenggiparang bang·engani gimin skigiparangba apsan daiko ra·na nanggen aro skie on·anirangko namdapatna gita gisiko nange kam ka·na nanggen ineba ua aganaha.
“Poraia dontonggiparang bang·engani aro PG rank-o komibatgipa ong·enganiara skigiparangni kamoba pangchaka,” ine Sangma aganaha.
SSA skulrangon poraia dontonggiparang bang·batenga ine janapatengon, je skigiparangan an·tangtangni kamrangko nambatatani pal dormaha bariatanikosa nangnikbatengachim, uandakgipa skigiparangde kamtangko waton nambatgen ine Education Minister aganaha.
“Je skulrangon poraigipa bi·sarang dongja, uandakgipa skulrango skigiparangkode apjitataha. Je skigiparangan skulrangchi re·na sikja aro skie on·na gisik nangja, uandakgipa skigiparangde kamtangko waton nambatgen,” ine ua aganaha.