SHILLONG: Meghalaya a·doko tourist taxi-rangko sale cha·enggipa manderangara driver-mangmangsan ong·ja indiba Meghalaya Tourism-ko ra·dona dakchakenggipa janggil bolgroba ong·a ine All Khasi Meghalaya Tourist Taxi Association (AKMTTA) parakataha.
Meghalaya a·dokni dingtang dingtang tourist spot-rangona Assam taxi-rangni mande salruraaniko jegale Budbar salo, AKMTTA-ni membor-rang, Shillong songjinmani Malki kal·chakramo tom·bimonganiko ong·atangaha aro antisani gisepon uamangni dabianiko chu·sokatchina a·dok sorkarina somoiko on·angaha.
Meghalaya a·doko taxi salruraenggipa manderangoni 60 percent-de association ba dolrang baksa bakrimgijagiparangsa ong·a aro bangki 40 percentba dingtang dingtang dake bikotgipa dolrangsa ong·a ine adita salrangna skang, a·dokni Tourism Minister Paul Lyngdoh-ni aganani ja·man, Khasi Hills jolrango taxi salgiparangni bilko aro ku·cholsan ong·aniko mesokna gita ia tom·bimonganiko ong·atangaha.
Iani bidingo kobor ra·timgiparangna talataniko on·angengon, Meghalaya a·doko tourist taxi-rangko salruraenggipa manderangara driver-mangmangsan ong·ja indiba Meghalaya Tourism-ni janggil bolgro gitaba ong·engani gimin a·dokni dingtang dingtang tourist spot-rangona Assam taxi-rangni mande salruraaniara uamangni bading chiwalaniko nosto ka·asan ong·jaenga indiba Meghalaya Tourism-ko tang·onatani gitaba ong·enga ine AKMTTA-ni president Ricaldinus Dohling parakataha.
“Chingni dabianiko salsnini gisepon chu·sokatchina dabie chinga a·dokni Chief Minister-na chittiko sedoataha aro salsnini gisepo chingni dabiani gita a·dokni dingtang dingtang tourist spot-rangona Assam taxi-rangni mande salruraaniko champengatjagenchimode chinga mikkangchi bilakbate jingjengatanirangko dakanggen,” ine Dohling aganaha.
Indake ong·engon, Meghalaya a·doko gital railway station-rangko rike somoirangko re·atani pal, Garo Hills-o dongsogimin Mendipathar Railway Station-kon namdapatchengchina gitaba AKMTTA, a·dok sorkariko didiataha.
“Garo Hills-on railway station dongsomanaha indide maini gimin a·dokni gipin biaprango gital railway station-rangko rike somoiko re·atna miksongenga? An·chingo dongsogimin railway station-kon namdapatchengna nangenga. Mendipathar-o railway station dongmanahani gimin Garo Hills-ba tourist-rangko sokachakanio dal·rorobaenggipa biap ong·a,” ine AKMTTA-ni membor Balajied Jyrwa aganaha.
Jyrwa-ni aganani gitade, Mendipathar railway station-ko namdapatanichi tourist-rangko bang·baten salbana man·gen aro ian jolo taxi sale cha·enggiparangna man·dapaniba ong·gen.
“Ral garirangode changsanon sak 500 ba sak 600-mangni gita manderangko salbana man·ani gimin ian taxi sale cha·enggiparangna bang·en dakchakani ong·gen,” ine ua aganaha.
Railway station-ko namdapatan baksana Umroi Airport-ko dal·batatna nangengani giminba AKMTTA, sorkarina ku·pattianiko on·ataha.