SHILLONG: ‘One Nation, One Election’ proposal-ko Budbar salo Union Cabinet ra·chakangahani gimin ia Bill-ara a·songna namgni ong·ode ua MLA ong·kugenchimoba ba ong·jahaoba ra·chakna kusi ong·aigen ine Opposition Trinamool Congress (TMC)-ni president aro MLA Charles Pyngrope parakataha.
“Ia niamko 2027 ba 2029 bilsio ja·rikna nange anga MLA ong·jahaoba, MLA ong·angkugenchimoba, ian a·songni namgninasa ong·genchimode ia Act-ko Parliament-o pass ka·anioba ra·chakna kusi ong·aigen,” ine Pyngrope aganenba, ian ua an·tangni chanchianisan ong·aia aro party-ni gitade ong·ja ine talataniko on·angaha.
Ia ‘One Nation, One Election’-ara a·songni pilak biaprangon Lok Sabha aro Assembly election-rangko apsan ong·atna miksonge ra·baenggipa proposal ong·achim aro ia proposal-ko Union Cabinet Budbar salo ra·chakahani gimin da·o Parliament-ni Winter Session-ode Bill dake ra·baani cholrang dongengahachim.
“Anga an·tangde ia Bill-ko chu·gimik poraie nikuja indiba ‘One Nation, One Election’-ara a·songni pilak biaprangon election-rangko apsan ong·atna miksongengani gimin somoi aro tangka paisarangni bon·anikode komiatna dakchakgen. Indiba ia Bill-ko pass ka·anichi mai dakgipa nangchakeanirang dongskagen, ukoba an·ching nitaina nanggen,” ine TMC-ni state president aganaha.
India a·songde United States a·songo gita ong·gija democracy-ni niamkosa ja·rika ine talataniko on·angengon, “Ian angni a·songna namgni ong·genchimode maina anga iako ra·chakjawa? Beben ia Bill-o namgni aro namgijanirangde dongaigen indide a·songna nambatgni ong·genode an·ching iako ra·chakna nangaigen,” ine Pyngrope aganaha.