SHILLONG: Rajya Sabha MP, Wanwei Roy Kharlukhi, Autonomous District Councils (KHADC & JHADC)-ni poll-o VPP-ko chena ka·dongja ine aganaha.
Kobor ra·timgiparang baksa agangrikmitingo Kharlukhi indine aganaha, “MP election aro district council-ni election-ara dingtanggrika apsan ong·ja. Maina council-ni election-o gimik ge 58 seat-rangon candidate-rang donggen. Uandake political party-rangni candidate-ko baseaniba council election-o bilongen gamchata.
MP election-o VPP cheaha beben indiba mikkangchi council election-oba chegen ine ong·ja, politics-o biapko ra·kange dongna namen neng·a, maina politics-o pangna dingtanganirang sokaia ine Rajya Sabha MP aganaha.
“Congress-kon niataibo, Delhi-o uamangni bil bon·angaon rang·san tang·onaha. Indiba bilsi 2025 -o Bihar aro bilsi 2027-o UP election-o India Alliance chea ong·ode uamang bilakgipa biapona re·bapilaigen. Indiba sirika ong·ode uan apsanpilaigen.”
Uandake NPP-ni Khasi aro Jaintia Hills-o niksengjani gimin mikkangchi maidakgipa obostao ong·gen ine sing·aon Kharlukhi, indine aganaha, “NPP Garo Hills-o pangkimgipa ong·a uni gimin ia party-ko bon·atna man·jawa.”
Iarangni gisepon MPCC chief Vincent H Pala-ni gimin sing·aon, “Pala-ni dilaniko bang·arangan jegaltokenga. Indiba Congress-ni Tura Parliamentary seat-ko Pala-ni dilanion cheaha, iako manderang gualenga. Internal politics-o jemangan an·tang dilgipa ong·na sika, uamangsa ong·gija kattarangko agana, ine Rajya Sabha MP aganaha.
Uandake Kharlukhi, an·tangni NPP-ni state president ong·mitingo uamang baksa sakgni MLA-san dongachim ine gisik ra·e aganaha. Indiba bilsi 2018-o chinga bilakbaaha. Da·ode beben Congress, Meghalaya-o bilongen bilgrienga. Indiba mikkangchi uamang bilaktaijawa ine agana man·ja, ian politics-ni nitoani ong·a, ine Kharlukhi agandapaha.
