Shillong airport-ko dal·batatna niamrangko olgrokatchina ma·mongko mol·molgen: Dy CM

SHILLONG: Shillong Airport-o dal·dalgipa sildorengrangko onchongatna man·na gita ia airport-ko dal·batatatna adita niamrangko watchina a·dok sorkari, ma·mong sorkario mol·molgen ine Sombar salo, a·dokni Deputy Chief Minister aro Transport Minister Sniawbhalang Dhar, Shillong airport-ko nieani ja·man parakataha.
Shillong airport-o dal·dalgipa sildorengrangko onchongatna nangdapenggipa acre 22 a·arangko ra·ani bidingo chanchirimna gita Budbar salo a·dokni Cabinet tom·gen ineba Dhar parakataha.
Sombar salo ua, Civil Aviation Ministry aro Airports Authority of India (AAI)-ni official-rang baksaba iani bidingo tom·e chanchirimangaha aro ia tom·anio, a·dokni Chief Secretary, Transport department-ni Commissioner & Secretary baksana gipin official-rangba dongpaaha.
Shillong airport-ko apalbatatna gita a·dok sorkari, adita niamrangko watchina ma·mong sorkario mol·molgen ine talataniko on·angengon, “Shillong airport-ko dal·batatna gita sorkari gisiko nange kam ka·enga,” ine a·dokni Deputy CM aro Transport Minister parakataha.
“Shillong airport-ko dal·batatna gita cholrang donga ine mesokenggipa AAI-ni gnigipa report-ko chinga man·soaha indiba ia airport-ko dal·batatna gita kamrangko ka·chakatna skang India sorkari baksa agangrikna nangkuenggipa adita kamrang dongkuenga,” ine Dhar aganenba, ia kamrangara airport-rangna dongimin niamrangni bidingo ong·a aro iani bidingo uamang ma·mong sorkario mol·molna nangenga ine parakataha.
Sing·anirangna aganchakaniko on·angkuengon, “Adita niamrangko watchina mol·molaniko ma·mong sorkari ra·chakjagenchimode Shillong airport-ko dal·batatanio korosrangko a·dok sorkari man·chakjawa indiba ia niamrangko watgenchimode ia airport-ko adita bilsirangni gisepon dal·batatna man·aigen,” ine Dhar aganaha.
Deputy CM aro Transport Minister-ni parakatani gitade, ia airport-ko dal·batatanio airport-ni runway-koba metre 900-mangni gita bakrodapatna nangengani gimin sorkari, a·bri dakgipa biaprangkode gelna nangnikenga.
“A·brirangko cho·na nanggenchimode gong kror 8000-na baten koros ong·gen indiba adita niamrang dongani gimin ia niamrangko watchina chinga ma·mong sorkariko mol·molgen,” ine ua aganaha.
Shillong airport-ko dal·batatna gita sorkari, acre 22 a·arangko ra·dapkuna nangenga ineba Dhar parakataha.
Iani bidingo a·dokni Cabinet Budbar salo tom·e chanchirimgen aro uni ja·man ma·mong sorkari baksa agangrikgen ine Deputy CM parakataha.