SHILLONG: College-rangko dilenggipa principal-rangan mikkangchi ong·nagipa chasongko tarisogiparang aro a·gilsakni seng·aniko rakkigiparang gita ong·a ine Mongolbar salo, Shillong-ni MP Ricky AJ Syngkon aganaha.
Mongolbar salo, Meghalaya College Principals Council (MCPC)-ni bilsini tom·bimonganiko Synod College-o ong·atanio jinmana aganprakangengon, a·doko nambatsranggipa lekka porako on·na gita rakbee kamrangko ka·engani giminba Shillong MP, dingtang dingtang college-ni principal-rangko mittelpilangaha.
College-ni principal-rangara, college-ko chalaigiparangsan ong·ja indiba skie ra·aniko tang·doatani a·bao bakrimaniko aro dakchakanirangko on·anichi dingtanganiko ra·baanio dilgiparangba ong·a ineba Syngkon aganaha.
Ia tom·anio Education department-ni Commissioner & Secretary Vijay Kumar Mantri-ba jinmana aganprakengon, college-rango chatro chatrirangna nambatgipa lekka porako on·anio gisik on·na man·na gita a·dok sorkari, NEHU aro HRD Ministry baksa dingtang dingtang neng·nikanirangko namatna nangrime kam ka·gen ine ku·rachakaniko on·angaha.
Ia tom·bimonganiko ong·atanio MCPC-ni gita, kamoni neng·takanggipa dingtang dingtang college-ni principal sakdokna aro NAAC accreditation man·gipa college-rangna mande ra·pilskaanikoba dakangjolaha.
Ia tom·anio MCPC-ni president Prof Eureka P Lyngdoh-ba jinmana aganprakengon, National Education Policy (NEP) 2020-ko ra·gatanio college-rangni chagrongna nangenggipa neng·nikanirangko jinmana talate on·angaha.
