SHILLONG: Meghalaya Public Service Commission (MPSC)-o kam ka·anio tik ong·ja ine matnanggipani bidingo sandiataniko namnikaia ine NPP dilgipa aro Rajya Sabha MP, Dr WR Kharlukhi Mongolbaro aganaha.
“MPSC-ni mamlako sandiatanio angode maming champengani dongja, uano VPP-niba donga, angni Mrs-ba, RTI ka·naba man·aigen, journalist-rangba kakketkosan parakna nanga, unigimin kakketmanchakon ma·sina nanga, anga angni Mrs baksaba aganjok, ua maiba gualaniko dakmanode pattokonaba re·na mande ong·enga,” Kharlukhi aganaha.
Sing·anirangna aganchakengon, anga MPSC-ni mamlako ja·manchakbeesa ma·siaha, jeon angni jikgipaba MPSC-ni membor ong·enga, ua aganaha.
Assam Public Service Commission (APSC)-ni chairman-ba kam tik ong·ani giminan pattoko napaha ine aganengon, “Supreme Court-ni rai on·gipa 87.5-de porikka seani aro 12.5 de personal inaniko chinga ra·chaka. Manderang, jeko dakna ka·na jakgitel ong·a indiba sakgipinchi knaaigipakode dakna nangja,” ua aganaha.
Sakgipinoniko knae ba jangani gimin dakaina nangja ine aganengon, Deputy Chief Minister Sniawbhalang Dhar-ko drugs badinganio jak donga ine matnangani gimin ua, (Dhar) MPCC chief Vncent H Pala-ni kosako defamation cas ka·gipakoba Kharlukhi janape aganaha.
“Pala-ni matnanga kakket ong·ode, Dhar pattoko napna nanggen aro Dy CM-o maming jak dongjaode, Pala gamdona nangskagen gipatna rikaina nangja ong·jaode ua politics-sa ong·aigen,” ua agandapaha.
Ru·utgija somoirangna skangosan, adita pressure group-rang MPSC-ni porikka ra·anirango tik ong·ja ine matnangenba jegalanirangko dakangahachim.
Unomitingo, Meghalaya Public Services Commission (MPSC)-ni kamrang tik ong·ja aro mikkang nitee daka ineba VPP-ba a·dok sorkarini kosako bilaken matnangaha.
