SHILLONG: Budbar salo, Khasi Students Union (KSU)-ni dilgiparang, a·dokni Governor Chandrashekhar H Vijayashankar-ko grongenba, a·dokni mingsni nanganirangko janape on·angaha.
A·dokni Governor-ko grongani ja·man, kobor ra·timgipa manderang baksa agangrikengon, uamang skanggipa a·doko Inner Line Permit (ILP)-ko ra·gatchina aro Khasi ku·sikko Constitution-ni Eighth Schedule-o napatchina dabienggipani bidingo Governor-na janape on·angaha ine KSU-ni general secretary Donald V Thabah parakataha.
Thabah-ni aganani gitade, ILP-ko ra·gatchina aro Khasi ku·sikko Eighth Schedule-o napatchina dabienggipani bidingo Assembly baditaba bilsirangna skangan resolution-ko pass ka·manaha ine uamang a·dokni Governor-na talate on·aha.
Meghalaya a·dokko Citizenship Amendment Act (CAA)-oniko chu·gimik watna nanga ineba uamang a·dokni Governor-ko didiangaha ineba KSU-ni general secretary parakataha.
Meghalaya a·doko Nepalirang bang·en songdong a·chatokengani gimin Indo-Nepal Friendship Treaty 1950-ko a·dokoba ra·gatchina gita uamang Governor-na u·iataha ineba Thabah aganaha.
Indake ong·engon, ru·uta bilsirangna Assam a·dokni simarango ong·enggipa obostarangko namatchina aro Meghalaya Public Service Commission (MPSC)-ko gital dake taripilna nangengani giminba uamang a·dokni Governor baksa agangrikaha ineba KSU-ni general secretary parakataha.
Thabah-ni parakatani gitade, Meghalaya a·doko Central Agricultural University-ko kulina gita 2010 bilsion ma·mong sorkari parakahani gimin a·dok sorkari, Ri Bhoi a·jani Kyrdemkulai-o donggipa acre 20 a·arangko tik ka·ahachim indiba 2019 bilsio ma·mong sorkari, ia University-ni pal, CAU Imphal-ni ning·o donggipa Agriculture College-kosa kuliskana tik ka·ahani gimin iani bidingoba uamang a·dokni Governor-na u·iataha.
 |
ReplyForward
|
