WILLIAMNAGAR: Williamnagar jillani Dawa Nengkatok jolo Ambi chiringko kabate rikenggipa dolongko matchotchipkujaengani a·sel jolo songdongenggipa manderang, mongsongbate chatro chatrirang, re·ruraanirango neng·nikanirangko chagrongna nangtokenga ine Williamnagar-ni saksa social activist Nilberth Ch Marak, East Garo Hills a·jani Deputy Commissioner-na badi ka·doangaha.
Deputy Commissioner-na badi ka·e sedoatgipa chittio Marak-ni parakatani gitade, ia dolongko rika bilsisa batpilengahaoba kamrang da·onan matchotchipkujaenga aro iani a·selan traffic jam ong·ani somoirango manderang, mongsongbate skulrangchi re·enggipa chatro chatrirang namen neng·nikanirangko chagrongna nangtokengachim.
“Ia dolongko rika matchotkujaengani a·selan traffic jam ong·na nangenga aro uasan ong·aigija basakobade ia ramao dal·a a·selrangkoba chagrongna nangani cholrang donga. Ia dolongko rika matchotkujaengani a·selan traffic jam ong·e manderang, mongsongbate skulrangchi re·enggipa chatro chatrirang ja·manchakrongna nangtokenga,” ine Marak parakataha.
Jail Building-oni Dobetkolgre-ona tarigipa ramako ru·uta somoirangna skangan matchotaha ine a·kangengoba, ia ramarango da·onan retaining wall-rangko tarikujaengani gimin a·arang rurongani cholrang dongaia ineba Marak, Deputy Commissioner-na badi ka·doangaha.
“Uni gimin jolo songdongenggipa manderangni namgnina Dawa Nengkatok-o rikenggipa RCC dolongko ta·raken matchotatna aro Jail Building-oni Dobetkolgre-ona tarigipa ramarango retaining wall-rangko tarina gita ge·etaniko on·china anga nang·ko mol·molenga,” ine Marak, East Garo Hills a·jani Deputy Commissioner-na sedoatgipa chittio janapataha.
 |
ReplyForward
|
