TURA: Central Agricultural University (Imphal)-ni ning·o donggipa Tura Community Science College-ni chang 21-gipa foundation day-ko re·anggipa Mongolbar salo, Tura-ni District Auditorium-o maniangaha aro ia manianio college-ni gitcham skigiparang, da·o skienggiparang, chatro chatrirang aro dingtang dingtang department-ni officer-rangba bak ra·angtokaha.
Ia program-ko a·bachengatanio, Community Science College-ni Dean Dr Jyoti V Vastrad, jinmana rimchaksoani kattarangko aganangengon, ia college-ni bilsi 21 gapanio chu·sokatgipa kamrangni giminba jinmana agan-talatanirangko on·angaha.
Ia manianio, Jorhat AAU-ni ning·o donggipa Community Science College-ni Dean Dr Mamoni Das, mongsonggipa sokgipa ong·e jinmana aganprakangengon, ia college-ko mikkangchiba nambatatangkuna gita dingtang dingtang institute-rang baksa nangrime research-rangko ka·na nangengani gimin aganangaha.
Ia tom·anio, Tura-ni Deputy Inspector General of Police (WR) Raghavendra Kumar MG-ba sokgipa ong·e, jinmana aganprakengon, ia college-ni bilsi 21 gapahanina college-ni skigiparangna aro chatro chatrirangna an·tangni namgipa skanirangko parakangenba, songsalo ong·gija dakgipa kamrang, jekai cyber crime, pekatgipa samrangko jakkalani, me·chik aro bi·sarangni kosako ong·gija dakani aro uandakgipa kamrangko champengna nangengani gimin aganangaha.
Ia tom·anio Tura-ni ADC Tengchi Margarette G Momin-ba saksa sokgipa ong·e, jinmana aganprakengon, lekka porako on·anichi songsalko dingtangatna man·ani gimin aganangaha.
Ia tom·anio dongpae bak ra·anggipa gipin manderangara, BSF-ni DIG Lalith Kumar Sharma, Tura-ni DFO Ganeshan, NEHU-oni Dr CP Suresh, Dr Gopal Shukla, Tura-ni Sericulture Officer Dr Indirakumar aro gipinrang ong·a.
Ia manianio Community Science College-ni chatrirang aro gipin biaprangoni okamatako man·e re·bagipa manderangba, gitrangko ring·anichi aro chrok mesaanirangchi manderangko an·saoatangaha.
Community Science College-ni chang 21-gipa foundation day-ko mania
Date:
Share post:
