SHILLONG: Pilak constituency-ni manderangan an·tangtangni dilgipako opposition-ona bate ruling-on ong·na nangnikbattokani gimin da·o ong·atna sienggipa Gambegre Assembly constituency-ni by-election-ko National People’s Party (NPP)-nan cheani cholrang dongbatenga ine NPP-ni dilgipa aro a·dokni Cabinet Minister Rakkam A Sangma aganaha.
“Election mingantian gamchatgipa ong·a aro na·simang da·o Gambegre-o ong·enga obostarangko niatgenchimode NPP-an manderangni chakpaanirangko man·batenga ine nikna man·gen. Anga Gambegre constituency-ona changgittam re·angaha aro NPP-ni campaign ka·anirango manderangni bak ra·anirangko nikna man·aha. Da·o dipet NPP-nan cholrang nambatenga gita nikenga,” ine Rakkam aganaha.
Gambegre constituency-ni manderang namroro silroroaniko nangnikengani gimin an·tangtangni dilgipako sorkario ong·akosa nangnikenga ineba ua aganaha.
“Gambegre constituency-ni manderang, skul, rama jal·lang, nokrang, hospital-rang aro pilak nanganirangkon chu·sokatchina nangnikengani gimin sorkario bak ong·na nangniktokenga. Gambegre-o dakna nanganirang bang·en donga aro ia pilak nanganirangko changsano chu·sokatna man·jagenchimoba, uamangni gisepo sorkarina chakpaanirang bilakrorobaenga,”
Sorkarini dingtang dingtang scheme aro namroro silroroanirangko on·anio opposition MLA-rangko nichanggalengama ine sing·anina aganchakaniko on·angskaengon, “Ian kakket ong·ja maina Opposition MLA-rang iandake matnanganirangko dakronga indiba Chief Minister-ko gronge proposal-rangkon on·ja. Oe beben sorkario ong·e chinga cholrangko nambate man·enga indiba sorkari, a·dokni pilak biaprangon namroro silroroaniko on·na jotton ka·enga,” ine Rakkam aganaha.
Gambegre by-election-o NPP baksa susagrikbatenggipa candidate-ara sawa ong·enga ine sing·skaon, “Iako agannade man·jawa indiba da·o dipet NPP-na cholrang nambatenga. Manderangni chakpaanirangko chinga nikna man·enga. Haida ia by-election-o Trinamool Congress (TMC) dol, NPP baksa susagrikbatnaba gnang,” ine NPP MLA aganaha.