TURA: Re·anggipa Sonibar salo Indian Oil Corporation (IOC) Limited-ni gita kg 2 ong·gipa free trade LPG (FTL), jekon ‘Munna’ mingachim, Tura jillaoba a·bachengate on·angaha.
Re·anggipa bilsio kg 5 ong·gipa LPG (Chottu)-ko a·bachengatanio chu·sokgipa ong·ahani gimin da·o kg 2 ong·gipa LPG (Munna)-ko IOC a·bachengatskaaha.
Ia kg 2 ong·gipa LPG (Munna)-ko IOC Assam Oil Division-ni Chief General Manager Dinesh Prasad-ni dilanichi a·bachengate on·aha aro ia LPG-ko a·bachengatanio, LPG Sales Guwahati Area Division-ni Head Shyamal Devnath aro Bongaigaon-II Sales Area-ni Sales Officer Sajib Malakar-ba dongpae bak ra·angaha.
Ia kg 2 ong·gipa LPG-ko a·bachengatani bidingo talate on·angengon, Meghalaya a·doko kg 5 ong·gipa LPG FTL namen jakkaltoenga ine nikenba, songre songgabatronggipa manderangna de·rurana altuna gita ia kg 2 ong·gipa LPG FTL-ko a·bachengataha ine IOC Assam Oil Division-ni Chief General Manager Dinesh Prasad parakataha.
Ia apsan salon, IOC-ni gita ‘Chotu Master’ cook top-koba a·bachengate on·angjolaha.
“Ia cook top-de regulator aro hose pipe-rangko jakkalna nanggipa ong·ja aro ian namen cheng·ani gimin ramasamrango bading chiwalgiparangna, chatro chatrirangna, cha dokkanrangna aro uandakgipa gipin manderangna namen jakkaltogipa ong·gen,” ine IOC-ni official parakataha.
