SHILLONG: Bilsi bongani gisepo gong kror lak 1.2 tangkarangko grant-in-aid dake on·china Meghalaya sorkari bi·ataha ine Sombar salo, 16th Finance Commission-ni Chairman Arvind Panagariya parakataha.
Iana skang 16th Finance Commission-ni Chairman, a·dokni Chief Minister Conrad K Sangma, Cabinet-ni dingtang dingtang membor-rang aro sorkari official-rang baksa tom·e chanchirimangaha.
41 percent-oni 50 percent-ona bilbataniara namen dal·aha ine janapatengon, da·o dipet finance commission, iandake dal·e bilbata changsaba dongkuja ine Panagariya aganaha.
Dingtang dingtang a·dokrangna tikatgimin bak rengsiko dangtapgenchimode pilak a·dokrangna chamgimin budget-on golmal ong·ani dongaigen ine nikenba da·o dipet finance commission, iandake a·dokrangna chamaniko dangdapa dongkuja ineba 16th Finance Commission-ni Chairman aganaha.
16th Finance Commission-ni tom·bimonganiko ong·atanio a·dokni Chief Minister Conrad K Sangma-ba jinmana aganprakangengon, a·dokni dal·roroani aro namroro silroroaniko champengenggipa dingtang dingtang neng·nikanirangko sorkari ma·siaha aro ia neng·nikanirangko namatna gita cholrangko man·engaha ine parakataha.
Iadakgipa neng·nikanirangko ia sorkari, batanggimin sorkarirangonikosa man·rikaha ine janapatengon, dingtang dingtang department-rango, mongsongbate health aro education-o ia sorkari chu·sokgipa ong·jaengachim indiba ra·bianirangko jako ra·e cholrangko sandienba da·o dingtang dingtang neng·nikanirangko namatna man·engaha ine Chief Minister aganaha.
15th Finance Commission-ni ning·o a·doko namroro silroroaniko ra·bana gita gong kror 3000 tangkarangko Meghalaya a·dokna on·aha aro Externally Aided Project (EAP)-rangni gitaba Meghalaya a·dok, gong crore 9000-mangni gita tangka paisarangko man·aha ineba Chief Minister aganaha.
