SHILLONG: Meghalaya a·dokni damgittam Autonomous District Council (ADC)-rang, gimik gong kror 8877.51-ko bilsi bongana 16th Finance Commission-oniko bi·ataha.
Ia gong kror 8877.51-oni Garo Hills Autonomous District Council (GHADC) gong kror 5042.30-ko, Khasi Hills Autonomous District Council (KHADC) gong kror 2641.54-ko aro Jaintia Hills Autonomous District Council (JHADC) gong kror 1019.60 tangkarangko 16th Finance Commission-oniko bi·ataha.
Sombar salo 16th Finance Commission-ni Chairman Arvind Panagariya-na apsan memorandum-ko on·angani ja·man kobor ra·timgipa manderang baksa agangrikengon, ia damgittam ADC-rang, gong kror 174.07 ong·gipa 2% contingency charges-naba 16th Finance Commission-na proposal-ko on·ataha ine KHADC-ni Chief Executive Membor (CEM) Pyniaid Sing Syiem parakataha.
16th Finance Commission-ni Chairman baksa tom·e agangrikani chu·sokgipa ong·aha ine janapatengon, re·baenggipa bilsioni Untied Grant-rangko bang·bate on·china ADC-rang, 16th Finance Commission-ko mol·molataha ine Syiem aganaha.
“15th Finance Commission-o gita ong·gija ia chango uamang Tied Grant-ko bang·bate on·aha. Ia Tied Grant-rangko Commission, bak dakaha aro iarangoni bang·batakon an·seng baljokani aro rongtal an·talani kamrangna jakkalgen. Tangka paisarangko jakkalna gita bak dakani a·sel chinga neng·nikanirangko chagrongna nangronga maina chinga skul, college, community building aro uandakgipa gipin kamrangnaba project-rangko nanga,” ine KHADC-ni CEM aganenba, uni giminsa ADC-rang, nokmarang ba elakarangni nangenggipa kamrangna jakkalna man·na gita Untied Grant-rangko bang·bate on·china mol·molataha ine parakataha.
Ma·mongni dakchake on·atenggipa tangka paisarangko Panchayati Raj Ministry gita ong·gija Development of North Eastern Region (DoNER) Ministry ba North Eastern Council (NEC)-ni gita ADC-rangna on·chinaba uamang 16th Finance Commission-ko mol·molataha ineba Syiem aganaha.
Meghalaya a·doko batanggimin bilsi 10-na koela bikotaniko champengatanichi JHADC aro GHADC-rangde kam ka·giparangna dormaharangko on·anio neng·nikanirangko chagrongna nangenga ine janapatskaengon, uni giminsa iandakgipa neng·nikanirangko 16th Finance Commission-na talate, district council-rangko chalaina gita tangka paisarangko dakchakatchina mol·molataha ine KHADC-ni CEM parakataha.