TURA: Meghalaya a·doko, mongsongbate Sixth Schedule a·jarango Tribal Tax Exemption Certificate-ko ra·na gita online system-ko a·bachengatchina South Garo Hills a·jani social activist Greneth M Sangma, a·dokni Chief Minister Conrad K Sangma-ko didiataha.
Iani bidingo a·dokni Chief Minister-na sedoatengon, Income Tax Act 1961-ni Section 10(26)-o Tripura, Mizoram, Manipur, Nagaland, Assam, Arunachal Pradesh aro Jammu & Kashmir-ni Ladakh jolrango songdongenggipa manderangkode tax ba kajina ra·aoniko watani gimin ia apsan niamkon Meghalaya a·dokni Sixth Schedule a·jarangoba ra·gatna nanga ine Sangma didiataha.
“Meghalaya a·dokba Sixth Schedule a·jao ga·akgipa ong·e kajina ra·aoniko watna nangachim indiba da·onan Tribal Tax Exemption Certificate-ko ra·anio Meghalaya a·dokni Tribal-rang neng·nikanirangko chagrongna nangkuenga. Uni gimin Assam aro Mizoram a·dokrango gitan Meghalaya a·dokni Sixth Schedule a·jarangoba ia Tribal Tax Exemption Certificate-ko ra·na gita online system-ko a·bachengatna nanga,” ine Greneth Sangma, a·dokni Chief Minister Conrad K Sangma-na sedoatgipa chittio janapataha.
Meghalaya a·dokni Sixth Schedule a·jarango Tribal Tax Exemption Certificate-ko ra·na gita online system-ko a·bachengatchina aro ia Exemption Certificate-na nanggipa lekkarangko apsan ong·atchina Chief Minister-ko didiatengon, ia bewal ba system-ko ra·gatanichi manderangna dangdike on·aniko nambatatna, kamo boja ong·aniko ritchengatna aro Income Tax Act 1961-ni Section 10(26)-o Tribal-rangni bilko rakkiangna man·gen ine Sangma parakataha.