TURA: Batanggimin salrango dontonggija mikkarang jime waanganichi a·arang be·dape aro chirang banne, Garo Hills gimiko komibeoba sak 15 manderang sina nangahani gimin sianggipa manderangni nokdangrangna ex-gratia ba tangka paisarangko on·china a·dokni Chief Minister Conrad K Sangma, Garo Hills-ni dingtang dingtang district administration-rangna ge·etaniko on·ataha.
Re·anggipa Bristibar salonin dontonggija mikkarang jime waanganichi Garo Hills gimikon a·a be·anirangko aro chi bannanirangko nikna man·engahachim aro iandake a·sel ong·anirango da·ona kingking komibeoba sak 15 manderang, janggitangtangko gimaatna nangengahachim.
Iandake a·sel ong·anirangchi manderang neng·nikanirangko chagrongna nangtokengani gimin a·dokni Chief Minister Conrad K Sangma, Garo Hills-ni dingtang dingtang district administration baksa video conference gita tom·e chanchirimangaha aro a·sel ong·anirangchi siangna nanggipa manderangni nokdangrangna ex-gratia-ko gamchina aro a·sel ong·anirangchi neng·nikanirangko man·enggipa manderangna pilak nanga dakchakanirangko on·china ge·etaniko on·angaha.
South Garo Hills aro West Garo Hills a·jani gisepo rama jal·langrang nosto ka·ako man·e ramarang champengataniko man·na nangengani gimin, a·ja damgnini gisepo re·ruraenggipa manderangna dingtang rama jal·langrangko tarie on·china gitaba Chief Minister ge·etangaha.
Re·anggipa Sukrobar pringosan, South Garo Hills a·jaona dakanggipa border ramao, Dalu Chaipani jolo donggipa dolong ge·sako chi pe·angaha aro da·o ia rama gita re·ruraani chol dongjahachim.
Ia dolongrangko ta·raken taripile on·china ge·etaniiko on·angengon, a·doko donggipa pilak bolni dolongrangko sandimanaha aro ia dolongrangni pal bailey bridge-rangko rike on·skagen ine Chief Minister ku·rachakaniko on·ataha.
Ia sal somoirango mikkarang namsrangkujaengani gimin pilak a·jani official-rangkon mikrake dongchina aro nangani kri ta·rake kamrangko ka·china gitaba Chief Minister ge·etaniko on·ataha.
Sianggipa manderangni nokdangrangna ex-gratia-ko on·china CM ge·eta
Date:
Share post:
